Khu gu gimbiya nya tepo, Bhalitazari a di khala pfhumu ya Bhabhiloni. Ga wutshigu nyo khaguri, a di gira festa a rana 1000 vathu nya lisima ngudzu va tigoni. A di ruma sithumi saye si ya mu dzegeya dzikopo nya ouro edzi Nabhukodhonozori a dzegidego omu tempele ya Jehovha. Bhalitazari ni vapfhumba vaye va di seya khu dzikopo dzodzo va bwe va dhumisa vanungungulu vawe. Gu di dugeleya gyandza nya muthu khavba ni avba gi pheya gu lova silo nyo hlamadzise avba nya paredhi nya nyumba va nga ba va hodzeya umo.

Bhalitazari a di pheya gu thava. A di rana ni dzinyanga dzaye a dzi tumbisa khuye: ‘O ka moyo wanu a si kodza gu nyi embeya gu khuye mo thula ginani malito yaya, a na khala nya wuraru nya lisima omu Bhabhiloni.’ Dzinyanga dzi di zama, ganiolu yi mwalo ne mweyo yi nga si kodza gu mu embeya gu khiyo ma di gu thula ginani malito yale. Mamayi wa Bhalitazari a di beya nyumbani a ta khuye: ‘Womo mwama nyo pwani khu Dhaniyeli a nga ba a oloveya gu tshamuseya silo nyo garadze Nabhukodhonozori. A nga si kodza gu gu tshamuseya gu khuye mo thula ginani malito yaya.’

Dhaniyeli a di hongola ga Bhalitazari. Khavbovbo, Bhalitazari a di khuye: ‘Wo si kodza gu leri malito yaya u bwe u nyi embeya gu khuwe mo thula ginani, nyi na gu ninga likordhawu nya ouro nyi bwe nyi gu gira u khala nya wuraru nya lisima omu Bhabhiloni.’ Dhaniyeli khuye: ‘Ne, kha nyi vbweti gilo avbo gwago. Ganiolu, nyi na gu embeya gu kheni malito yaya mo thula ginani. Papayi wago Nabhukodhonozori a diri muthu nya matshandza. Khu kharato, Jehovha a di mu phwinya giwungu. U ngu siti gwadi satshavbo si nga girega. Ganiolu, u nga gu kanyisa Jehovha khu gu seya vhinyu khu dzikopo dzaye nya ouro dzi nga ba dziri omu nya Tempele Yaye. Khu kharato, Jehovha a di lova malito yaya: Mene, Mene, Tekeli, ni Parisimi. Malito yaya mo vbweta khayo Vamedhi ni Vaperesi va na pala Bhabhiloni, nigu uwe kha wu na nga fuma gambe.’

Si di gu wonegisa gu gu diri mwalo litigo li nga hadzi pala Bhabhiloni. Lidhoropa leli li di bhiyidwe khu muru nyo tiye ngudzu  nigu li di randredwe khu tsongo nya wukhongolo. Ganiolu, ga wutshigu wowo kamo, Vamedhi ni Vaperesi va di li dhumeya. Kiro, Pfhumu ya Persiya a di bangisa mati nya tsongo gasi masotshwa yaye ma kodza gu tshatuga ma gweya kala vbamwanya nya lidhoropa. Tepo va nga vboha, va di ya mana malimba na ma tudwe! Masotshwa ma di beya dhoropani, ma li wugeya ma bwe ma songa pfhumu. Khavbovbo, Kiro a di fumeya Bhabhiloni.

Na gu si gu vbindri mwaga, Kiro a di tiya khuye: ‘Jehovha nyi rumide gu vbahedza tempele yaye Jerusalema. Ni wevbini vbakari nya vathu vaye a vbwetago gu phasedzeya, a na hongole.’ Kha nga edzi Jehovha a tumbisidego khidzo, vaJudha nya vangi va di bweleya Jerusalema hwane nyo ba gu vbindride 70 myaga na gu tshungunudwe. Kiro a di bweledza dzikopo nya ouro ni prata edzi Nabhukodhonozori a nga ba a dzegide omu nya tempele. U ngu wona edzi Jehovha a thumisidego khidzo Kiro gasi gu phasa vathu vaye?