Jehovha a di hatha Jeremiya gasi a ya profeta ga vathu va Judha. A di mu ruma gu ya tshumayela vathu a bwe a va embeya khuye gu vbwetega va diga gu gira silo nyo vivbe. Jeremiya a di dzi wona na si ninganedwi, a embeya Jehovha khuye: ‘Jehovha, eni nyi ngari gyanana. Kha nyi kodzi gu ganeya vathuni.’ Jehovha khuye: ‘U nga thavi. Nyi na gu embeya esi u yedego gu ganeya. Nyi na gu phasa.’

Jehovha a di embeya Jeremiya gasi a tshanganisa madhota ya Judha, a vbedza a pandra khali nya libumba mbeli gwawe, khuye: ‘Jerusalema nuye a na pandrwa nga khali yeyi.’ Tepo Jeremiya a nga gira esi a nga rumwa khu Jehovha, madhota ma di zangari ngudzu. Mupristi nyo khaguri nyo pwani khu Pasuri a di mola Jeremiya a mu veta, a bwe a mu hungeleya mawogo ni mawundru avba nya madhera. Jeremiya a di khala wutshigu watshavbo na hungidwe na si kodzi gu dzi khutakhuta. Ni dzimindru dzakona, Pasuri a di mu tshula. Jeremiya khuye: ‘Nyi garade khu gu tshaniseka. Tshukwana nyi diga gu tshumayela.’ Ina a di hegiside khu gu diga kamo? Ahihi. Tepo Jeremiya a nga dundrugeya gwadi khiso, a di vbedza khuye: ‘Malito ya Jehovha ma gu fana ni nilo wu dzurago ndrani gwangu. Kha nyi na nga diga gu tshumayela.’ Jeremiya a di simama gu gengedza vathu — a va tshumayela.

Gu di vbindra myaga nyo khaguri, nigu Judha gu di pheya gu fuma yimbe pfhumu. Mahungu aya Jeremiya a nga ba a tshumayela ma di gu nyenywa khu vapristi ni vaprofeti nya malipha. Va di embeya vathangeyi khavo: ‘Mwama yoyu gu vbwetega a songwa.’ Jeremiya khuye: ‘Ambari mo nyi songa, nyi mwalo nandru. Esi nyi mi embeyago sa guta khiyo ga Jehovha, khandri sangu.’ Tepo vathangeyi va ngapwa isoso, va di khavo: ‘Hi nga mu songini mwama yoyu.’

 Jeremiya a di simama gu tshumayela. Ganiolu, vathangeyi si di gu simama gu va gorosa. Va di lomba pfhumu gu khavo a songwa Jeremiya. Pfhumu yi di va embeya khiyo va na gire ni gevbini va gi vbwetago khu Jeremiya. Va di dzega Jeremiya va mu rinya omu nya nambu nyo laphe, wu nga ba wuri ni maraga, na va vireya gu khavo a feya umo. Jeremiya a pheya gu dzama umo nya maraga.

Khavbovbo, mwama nyo khaguri nyo pwani khu Ebhedhi-Meleki a nga ba a thuma nyumbani nya wufumu a di embeya pfhumu, khuye: ‘Vathangeyi va rinyide Jeremiya omu nya nambu! Ha gu mba mu dusa, a nafa.’ Pfhumu yi di ruma Ebhedhi-Meleki gu khiyo a dzega 30 vama a hongola navo va ya dusa Jeremiya namboni. Khandri tshukwana hi fana ni Jeremiya nethu, hi si digi gilo gi hi tandregisa gu tshumayela?