Matshiguni ya Ezra, gu diri ni Muisrayeli nyo pwani khu Nehemiya a nga ba ari githumi gya Aritasesi, Pfhumu ya Suza — li nga ba liri lidhoropa nya litigo la Persiya. Ndriye wa Nehemiya a di mu endreya a ya mu embeya mahungu nya mba tsakisa. A di khuye: ‘Vathu va gu romo Jerusalema va ngu tshaniseka ngudzu. Muru nya lidhoropa wu nga khungumudwa khu Vabhabhiloni wu si wuswi.’ Nehemiya kha sa mu tsakisa isoso. A di hunga gu hongola Jerusalema a ya va phasa. Khu kharato, a di gombeya gasi gu pfhumu yi mu dzumeleya gu a hongola.

Ga litshigu nyo khaguri, pfhumu yi di wona Nehemiya na sa tsaka. Yi khiyo: ‘Kha nyi guti kharato. Ginani?’ Nehemiya khuye: ‘Nyi di hadzi tsaka kharini narigu Jerusalema lidhoropa lathu li tshungunudwe.’ Pfhumu yi di mu wudzisa khiyo: ‘Ginani u vbwetago gu khuwe nyi gu gireya?’ Nehemiya a di dzegeya gu gombeya khu monyoni, khavbovbo khuye: ‘Nyo lomba gu kheni u nyi diga nyi hongola Jerusalema nyi ya vbahedza muru nya lidhoropa.’ Pfhumu Aritasesi a di embeya Nehemiya gu a hongola, a bwe a mu gireya esi si nga ba si vbwetega gasi a endra gwadi kala a vboha. A di bwe a mu emisa kha nga ghovherinadhori, a mu ninga madhera gasi a ya gira khayo malimba nya lidhoropa.

Tepo Nehemiya a nga vboha Jerusalema, a khedzakhedza muru nya lidhoropa. Khavbovbo, a di ranisa vapristi ni vathangeyi a va embeya khuye: ‘Giemo gegi kha gya khalega. Gu vbwetega hi khugani hi thuma.’ Vathu va di dzumeya, va pheya gu vbaha muru.

Ganiolu, vathu nyo khaguri va nga ba va nyenya Vaisrayeli va di pheya gu va hega khavo: ‘Muru wowo mu vbahago ambari ngehe wu nga wu txhovha wu thega.’ Ava va nga ba va vbaha, kha va theya kota khu givalo gyogyo, va di simama gu vbaha. Va di vbaha muru nya wukhongolo wu bwe wu tiya.

Valala vawe va di hunga gikungo nya gu vata khu malangani nyo hambanehambane va ta dhumeya Jerusalema khavba ni avba. Tepo Vajudha va nga sipwa isoso, va di thava. Ganiolu, Nehemiya a di va embeya khuye: ‘Mu nga thavi. Jehovha a na ni ethu.’ A di emisa vathu gasi va vhikeya ava va nga ba va vbaha. Khu kharato, valala kha va si kodza gu va dhumeya.

 Va di vbedza gu vbaha muru watshavbo khu 52 matshigu basi. Nehemiya a di ranisa Valevhi vatshavbo va hongola Jerusalema va ya gira festa, nya gutsake kholu va vbedzidego gu vbaha. A di va vega khu mitsawa mivili gasi va embeleya. Va di lita khu dzixikadha va duga, wumbe tsawa wu beya kheno, owu wumbe wu beya kheno, va dzuwuluga lidhoropa latshavbo. Va di womba dzingoma, dzimbila ni sitendre va embeleya ga Jehovha. Ezra a di hongola ni tsawa moyo. Nehemiya a hongola ni owu wumbe tsawa kala va ya manana tempeleni. Vathu vatshavbo — sanana ni vakhongolo — va di gira miningelo ga Jehovha, va tsaka. Malito yawe nya gutsake ma di pwala hwindzo.