Ga wutshigu nyo khaguri, Pfhumu Nabhukodhonozori a di lora silo nyo hlamadzise. Si di mu garadza ngudzu nyo bwe si mu beya ni ligovbe. A di ranisa dzinyanga dzaye, khuye: ‘Nyi embeyeni gu khenu esi nyi nga lora so thula ginani.’ Dzinyanga dzi di khidzo: ‘Pfhumu, nga hi embeya esi u nga lora.’ Ganiolu, Nabhukodhonozori a di bomba, khuye: ‘ Ahihi! Nyi embeyeni enu gu khenu ginani nyi nga lora, nyi nga mi songa.’ Dzinyanga dzi di pheledza gambe khidzo: ‘ Hi embeye esi u nga lora, hi na vbedza hi gu embeya gu khethu so thula ginani.’ Nabhukodhonozori khuye: ‘Mwatshavbo enu mo zama gu nyi kanganyisa. Nyi embeyeni gu khenu ginani nyi nga lora!’ Dzinyanga dzi di hlamula, khidzo: ‘Mwalo a si kodzago gu gira isoso. Esi u si vbwetago kha si kodzegi.’

Nabhukodhonozori a di zangari ngudzu nyo bwe a rumisa gu khuye dzinyanga dzatshavbo ni vagengeyi va Bhabhiloni va songwa — avbovbo gu di gu patwa Dhaniyeli, Sadraki, Misaki ni Abhedhi-Negho. Dhaniyeli a di lomba pfhumu gu khuye yi mu ninga gitepwananyana. Dhaniyeli ni dzipari dzaye nya dziraru va di lomba Jehovha gu khavo a va phasa. Ginani egi Jehovha a nga gira?

Jehovha a di thumisa giwoniso, a yeyedza Dhaniyeli esi Nabhukodhonozori a nga ba a loride a bwe a mu embeya gu khuye so thula ginani. Ni dzimindru dzakona, Dhaniyeli a di hongola ga sithumi sa pfhumu, a ya khuye: ‘Mu nga songi ne moyo nya vagengeyi vava. Eni nyi nga yi tshamuseya gu kheni so thula ginani esi pfhumu yi nga lora.’ Sithumi si di dzega Dhaniyeli si hongola naye ga Nabhukodhonozori. Dhaniyeli a di ya embeya pfhumu, khuye: ‘Nungungulu o gu tivisa esi si na giregago teponi yi tago. Esi u nga lora khesi: U wonide gifananiso nya gikhongolo nya hungo nya ouro, khana ni mawogo nya prata, avba nya girumbu kala omu nya dzikhingimidzi i cobre, mawundru yagyo i simbi nigu migondro yagyo i simbi nyo patwe ni libumba. Khavbovbo, gu dita giwindri khu vbatshani nya gigomo gi ta khungumula gifananiso khu migondroni. Gifananiso gi di pandrega  gi khala pupu. Gu di veta phuvbo yi ta gi phalalegisa. Giwindri gyogyo gi di khala gigomo nya gikhongolo, gi tadza mafu.’

Dhaniyeli a di vbedza khuye: ‘Esi u nga lora so thula esi: Hungo nya ouro wo emeya mufumo wago. Gipandre nya prata gyo emeya mufumo wu landreyago owu wago. Gu nata wumbe mufumo nyo fane ni cobre, wu na fumeyago mafu yatshavbo. Owu wumbe wu na landreyago wu na ba wuri ni tshivba ni gu tiya gu fana ni simbi. Khu guhegisa, gu na ba guri ni mufumo nyo tiye gu fana ni simbi wu bwe wu fana ni libumba khu gu mba tiya. Giwindri gegi gi nga khala gigomo go thudwa Mufumo wa Nungungulu. Mufumo wowu wu na fuvisa mifumo yatshavbo wu fuma uwo kala gupindruga.’

Nabhukodhonozori a di khidzimeya Dhaniyeli, khuye: ‘Khu Nungungulu wago a nga gu embeya esi nyi nga lora. Mwalo Nungungulu nyo fane naye.’ Nabhukodhonozori kha songa Dhaniyeli. Ganiolu, a di mu emisa kha nga muthangeyi nya vagengeyi vatshavbo a bwe a mu emisa kha nga muthangeyi wa Bhabhiloni. U ngu wona edzi Jehovha a nga hlamula khidzo nombelo wa Dhaniyeli?