GIHEVBULO 62
Nabhukodhonozori a lora simbo nya wukhongolo
Ga wutshigu nyo khaguri, Nabhukodhonozori a di lora silo nyo thavise. A di rana vama vaye nyo gengeye gasi va mu embeya gu khavo so thula ginani esi a nga lora. Ganiolu, mwalo gwawe a nga si kodza gu mu tshamuseya. Khu guhegisa, pfhumu yi di ya ganeya ni Dhaniyeli.
Nabhukodhonozori a di embeya Dhaniyeli, khuye: ‘Nyi di lora simbo. Wu diri simbo nyo laphe ngudzu wu nga ba wu vboha ni ndzadzini. Wu di gu wonega khu maphuvbo yatshavbo nya mafu. Wu diri ni mahagani nyo mbure ni mihandru nya yingi. Sirengo si di gu hefemula mutsani nya simbo wowo; sinyoni si di gu vbaha sisakha omu nya matamu yakona. Gu dita ngilozi khu ndzadzini, yi ta ganeya esi khu lito nyo khugege: “Kokani simbo wu thega vbavbatshi, mu kokeleya matamu yakona. Ganiolu, mu nga kunuli gihuru gyakona, gi digeni mafuni ni mikhamba yagyo, mu bwe mu gi hunga libhandri nya simbi ni kobre. Monyo waye wu na vbindrugedzwe wu si khali gambe monyo nya muthu, aholu a ningwa monyo nya girengo kala guvbindra 7 dzitepo. Vathu vatshavbo va na dziti gu khavo Nungungulu khuye Pfhumu nigu a na diga ni wevbini a mu vbwetago a fuma.”’
Jehovha a di phasa Dhaniyeli gu pwisisa gu khuye si di gu thula ginani esi si nga lorwa khu Nabhukodhonozori. Tepo Dhaniyeli a nga dziti gu khuye si di gu tshamuseya ginani, a di thava khavbovbo, khuye: ‘O pfhumu, nari khatshi esi u nga lora si di gu ganeya khu valala vago, gu diri tshukwana. Ganiolu, so ganeya khuwe kamo. Simbo wowu nya wukhongolo khuwe. U na luza mufumo wago u bwe u ya hodza mwasi khabini gu fana ni sirengo nya likhabi. Ambari ulolo, kha nga olu ngilozi yi nga khiyo digani gihuru ni mikhamba yakona mafuni, u na bwe u wuya u ta khala pfhumu.’
Hwane nyo ba gu vbindride mwaga, Nabhukodhonozori a diri vbatshani nya nyumba yaye nya wufumu na gu khedziseya Bhabhiloni. A di khuye: ‘Nga wonani gumbura ni gu hlamadzisa nya lidhoropa nyi nga vbaha. Bayi nyi khongolo kamo!’ Na nga gu ganeya, gu di pwala lito khu ndzadzini khilo: ‘Nabhukodhonozori! U dzegedwe mufumo wago.’
Khu tepo yoyo kamo, Nabhukodhonozori a di pheya gu handruga, a gira nga khatshi girengo nya likhabi. Va di mu dusa khu nyumbani nya wufumu a ya vbanya khabini ni sirengo. Ndzudzu waye wu di dandra, wu fana ni mitenga nya lighama, samba saye si di fana ni esi nya sinyoni.
Hwane nyo ba yi vbindride 7 myaga, Nabhukodhonozori a di pheledza gu pimisa nga muthu, Jehovha a mu emisa gambe kha nga pfhumu ya Bhabhiloni. Khavbovbo, Nabhukodhonozori a di khuye: ‘Nyi ngu gu dhumisa Jehovha, Pfhumu ya ndzadzini. Olu nyi ngu dziti gu kheni Jehovha khuye Pfhumu. A ngu kodza gu vega vbavbatshi vathu nya gu dzi khusedze, a bwe a ningeya mufumu ga oyu a mu vbwetago.’
“Matshandza ma gu rana libango, ni gu dzi khusedza gwa gu thangela lufu.” — Mavingu 16:18