Esteri a diri gyagadzyana nya Mujudha gi nga ba gi vbanya dhoropani ga Suza tigoni ga Persiya. Gu di gu vbindra myaga nya yingi, valongo vaye na va modwe khu Nabhukodhonozori eyi Jerusalema. Esteri a di gu sayiswa khu tiyu waye Moridhekayi, a nga ba ari githumi gya Asuwero, Pfhumu ya Persiya.

Pfhumu Asuwero a di gu vbweta nyamayi nya muphya. Sithumi saye si di hatha vanyamayi nyo mbure ngudzu va tigoni va hongola navo ga Asuwero, gupata ni Esteri. Ga vanyamayi vovo, pfhumu yi di hatha Esteri. Moridhekayi a di embeya Esteri gu khuye a nga ganeyi gu khuye Mujudha.

Gu diri ni mwama nyo khaguri nyo dzi khusedze nyo pwani khu Hamani, oyu a nga ba a thangeya vathangeyi vatshavbo. A di gu vbweta gu khuye vatshavbo va mu khidzimeya. Ganiolu, Moridhekayi a di bomba gu mu khidzimeya. Khu kharato, Hamani a di goroga ngudzu nyo bwe a vbweta ni gu mu songa. Tepo Hamani a ngati gu khuye Moridhekayi Mujudha, a di luga makungo nyo songe Vajudha vatshavbo va nga ba vari tigoni mule. A di embeya pfhumu khuye: ‘Vajudha sighevenga; gu vbwetega va fuviswa.’ Asuwero khuye: ‘Gira ni gevbini u gi wonago.’ A di bwe a mu ninga ni tshivba nya gu emise ni nayo wakona. Hamani a di emisa nayo wu nga ba wu embeya vathu gu khuwo khu litshigu nya 13 nya ngima nya Adhari va di yede gu songa Vajudha vatsavbo. Jehovha a di gu si wona.

Esteri kha nga ba a wuti nayo wowo. Khu kharato, Moridhekayi a di mu rumeleya lidangaliya li nga ba liri ni nayo wowo, a bwe a mu embeya khuye: ‘Gimbiya u ya ganeya ni pfhumu.’ Esteri khuye: ‘U ngu dziti uwe gu khuwe ni wevbini a hongolago ga pfhumu na sa ranwa, a gu songwa. Gu ngu vbindra 30 matshigu pfhumu na yi si nyi rani. Ganiolu, nyi na hongola. Yo nyi khusedzeya ndronga nya wufumu, kha nyi na nga songwa. Yo mba nyi khusedzeya, nyi fude.’

Esteri a di hongola nyumbani nya wufumu. Tepo pfhumu yi nga mu wona, yi di khusedza ndronga nya wufumu. Esteri a di hidzimeya vbafuvbi, khavbovbo pfhumu yi mu wudzisa khiyo: ‘Ginani u vbwetago gu khuwe nyi gu  gireya, Esteri?’ A di hlamula khuye: ‘Nyo vbweta gu kheni uwe ni Hamani muta avba nya festa nyi dongiseyago.’ Tepo va nga hongola festatunu, Esteri a di va raneya yimbe festa nya wuvili. Tepo va nga ba vari vbakari nya festa nya wuvili, pfhumu yi di wudzisa gambe Esteri khiyo: ‘Ginani u vbwetago gu khuwe nyi gu gireya?’ A di hlamula khuye: ‘Gu na ni muthu a vbwetago gu songa eni ni vathu va tigoni gwangu. Ho lomba gu khethu u hi vbulugisa.’ Pfhumu yi di mu wudzisa khiyo: ‘Khu mani a vbwetago gu mi songa?’ Esteri khuye: ‘Khu Hamani, mwama yoyu nya guvivbe.’ Asuwero a di goroga ngudzu nyo bwe a rumisa gu khuye Hamani a dzegeya gu songwa.

Ganiolu, mwalo a nga ba ari ni tshivba nyo fute nayo wa Hamani gasi wu si thumi, ambari pfhumu yi diri mwalo fanelo nyo gire isoso. Khavbovbo, pfhumu yi di emisa Moridhekayi gasi a thangeya vathangeyi vatshavbo va tigoni a bwe a mu ninga tshivba nyo emise nayo nya wuphya. Moridhekayi a di emisa nayo nya gu Vajudha va dzi vhikeya khu gu dzi dwaneya vo wugedwa. Khu litshigu nya 13 nya ngima nya Adhari, Vajudha va di dwana ni valala vawe va pala. Gukhugeya avbovbo va di pheya gu gira festa mwaga ni mwaga khu litshigu lolo.