Elizabheti a diri ni nongo nya nandra gwaye a nga ba a vbanya dhoropani ga Nazareta, Galileya. Nongo yoyo gu diri Mariya. Mariya a di gu namorari ni Josefa, a nga ba ari karipinteru. Tepo mimba ya Elizabheti yi nga gira 6 migima, Mariya a di endredwa khu ngilozi Gabriyeli, a ya khuye: ‘Sewe Mariya. Jehovha gu tsakede ngudzu.’ Mariya kha nga ba a si pwisisa esi Gabriyeli a nga ba a ganeya. Khavbovbo, Gabriyeli a di khuye: ‘U na khura mimba u velega gyanana nya gikhwathana. U na gi riya khuwe khiyo Jesu. Gyanana gyogyo gi na khala Pfhumu. Mufumo wagyo wu na fuma kala gupindruga.’

Mariya a di khuye: ‘Nyi na velega kharini gyanana? Kholu eni nyi si lali ni mwama!’ Gabriyeli khuye: ‘Gi mwalo a gi tandrago gu gira Jehovha. Liphuvbo nya guage li na gu tshigeya, khavbovbo u na khura mimba u velega gyanana. Nongo wago Elizabheti nuye khuride mimba olu a gumbidego.’ Mariya a di vbedza khuye: ‘Nyi githumi gya Jehovha. Si na girege gwangu esi u si ganedego.’

 Mariya a di endra a hongola a ya wuseya Elizabheti, dhoropani gwaye gu nga ba gu manega sigomoni. Tepo va nga losana, Elizabheti a dipwa gyanana gyaye ndrani na gi ndraga. A di tala khu liphuvbo nya guage, khuye: ‘Mariya, Jehovha a gu kategiside. Lithomo nya likhongolo ngudzu gwangu gu wona mamayi wa Pfhumu yangu avba gaya gwangu. Mariya khuye: ‘Nyi ngu mu zundza ngudzu Jehovha khu monyo wangu watshavbo.’ Mariya a di khala ni Elizabheti khu migima miraru, a vbedza a bweleya gaya gwaye Nazareta.

Tepo Josefa a ngapwa gu pwani Mariya a diri ni mimba, a di vbweta gu mu diga. Ganiolu, a di lora ngilozi na yi mu embeya khiyo: ‘U nga thavi gu tshadha ni Mariya. Gi mwalo nyo vivbe a giridego.’ Josefa a di tshadha ni Mariya, a mu dzega va ya khala vatshavbo.