Josefa ni Mariya va di gu vbanya Nazareta ni Jesu gumogo ni simbe sanana sawe nya sagadzyana ni sikhwathana. Josefa a di gu thuma wukaripinteru gasi gu mana dzitsapawu nyo sayise khidzo ndranga yaye, nigu a di gu yi hevbudza gu haladza Jehovha ni gu engisa milayo yaye. Mwaga ni mwaga, vatshavbo va di gu hongola Jerusalema gasi va ya hodza Phasika.

Tepo Jesu a nga tshanganisa 12 myaga, va di gimbiya pfhuka nyo laphe na va hongola Jerusalema, kha nga va nga ba va oloveya gu gira. Lidhoropa latshavbo li di tade khu vathu va nga ba va teya Phasika. Hwane nya Phasika, Josefa ni Mariya va di dzega lipfhumba nyo bweleye gaya, na va pimisa gu khavo Jesu va naye. Ganiolu, tepo va nga mu vbwetedzeya ga valongo vawe, kha va mu mana.

Va di bweleya Jerusalema va ya vbwetedzeya gyanana gyawe khu matshigu mararu. Khu guhegisa, va di ya beya tempeleni. Khumo va nga ya maneya umo Jesu! Va di ya mu mana na khade vbakari nya vahevbudzi nya nayo a va engiseya ni gu va gira siwudziso nya sadi. Vahevbudzi nya nayo  va di hlamala ngudzu nyo bwe va pheya gu mu gira siwudziso. Va di hlamala khu ndziya a nga ba a va hlamula khiyo gambe. Va si wone gu khavo a di gu pwisisa Nayo wa Jehovha.

Josefa ni Mariya va di gu garadzega ngudzu. Mariya a di embeya Jesu khuye: ‘Mwanangu, hi gu vbwetedzede gwatshavbo! Gasi u diri hayi?’ Jesu khuye: ‘Nyi diri omu, nyumbani ga papayi wangu.’

Jesu a di bweleya Nazareta ni vavelegi vaye. Josefa a di hevbudza wukaripinteru Jesu. Khu mawonelo yago, Jesu a diri muthu nya khale kharini tepo a nga ba a ri gikhwathana? Tepo a nga ba a dandra, Jesu a di engedzeya gu manega ni wugengeyi nigu a di tsakedwa khu Nungungulu ni vathu.