Hwane nyo ba yi vbindride 400 myaga na gu wusidwe muru nya lidhoropa la Jerusalema, gu di dugeleya mwama moyo nyo pwani khu Zakariya, a nga ba a vbanya ni mwangadzi waye Elizabheti vbafuvbi ni lidhoropa lolo. Gu di gu vbindra myaga nya yingi na va tshadhide, ganiolu va diri mwalo gyanana. Litshigu nyo khaguri, Zakariya na gu vbisa libani wulangani nya guage ngudzu omu nya tempele, a di tedwa khu ngilozi nyo pwani khu Gabriyeli. Zakariya a di thava. Ganiolu, Gabriyeli khuye: ‘U nga thavi. Jehovha nyi rumide gu ta gu embeya mahungu nya yadi. Mwangadzi wago Elizabheti a na velega gyanana nya gikhwathana, lina lagyo li na ba li ri Johane. Jehovha hathide Johane gasi a gira thumo nyo hathege.’ Zakariya a di mu wudzisa khuye: ‘Ginani gi na girago nyi khodwa esi u ganeyago? Mwangadzi wangu gumbide ngudzu. Kha nyi tumbi gu kheni a nga na velega gambe.’ Gabriyeli khuye: Nyi rumidwe khu Nungungulu gu ta gu embeya mahungu yaya. Olu u gu mba khodwa, khu na nga kodza gambe gu ganeya kala gi velegwa gyanana gegi.’

Zakariya a di hweya ngudzu wulangani nya guage ngudzu guvbindra aya mambe matshigu. Khu kharato, tepo a nga duga, ava va nga ba va mu vireya vbavbandze va di gu vbweta guti gu khavo khu ginani a nga ba a hweya. Zakariya kha nga ba a si kodza gambe gu ganeya. A di gu kodza gu ganeya khu mawogo basi. Vathu va di dzegeya gu dziti gu khavo a di embedwa mahungu ma nga ba mata khu ga Nungungulu.

Khu gu gimbiya nya tepo, esi ngilozi yi nga ganeya si di girega kamo. Elizabheti a di velega gyanana nya gikhwathana. Dzipari ni valongo vaye va dita va ta wona gyanana gyogyo. Va di tsaka kholu a velegidego gyanana. Elizabheti a di va embeya khuye: ‘Hi na mu riya khethu khuye Johane.’ Avo va di khavo: ‘Mu mwalo nongo nyo pwani khu Johane! Mu riyeni lina la papayi waye, khenu khuye Zakariya.’ Ganiolu, Zakariya a di lova khuye: ‘Lina laye khuye Johane.’ Khu tepo yoyo, Zakariya a di pheledza gu ganeya! Si di tivega Judhiya gwatshavbo gu Zakariya ni Elizabheti va velegide gyanana. Vathu va di hlamala ngudzu, khavbovbo khavo: ‘Gyanana gyogyo, tepo gi na dandrago somo gi na girago!’

 Khavbovbo, Zakariya a di tala khu liphuvbo nya guage, a profeta khuye: ‘A na dhumiswe Jehovha. Tumbiside Abrahama khuye a na rumeya muvbanyisi, a gu Mesiya, gasi a ta hi vbanyisa. Johane a na ba ari muprofeti. A na dongiseya ndziya gasi ata Mesiya.’

Nongo wa Elizabheti nyo pwani khu Mariya a di dugeledwa khu silo nyo hlamadzise. Hi na si wona avba nya gipimo gi landreyago.