Hwane nyo ba Jesu a tshumayede khu tanga nya mwaga ni metadu, a di yede gu hunga silo nya lisima ngudzu. A di yede gu hatha ava a nga hadzi thuma navo tepo yatshavbo a bwe a va hevbudza gasi va thangeya libandla nya Wukristo. Jesu a di wona gu khuye gasi a kodza gu hatha gwadi vapostoli, a di yede gu phaswa khu Jehovha. Khu kharato, a di hongola gigomoni avbo a nga hadzi ya manega nari enga. Tepo a nga vboha gigomoni, a di gombeya wutshigu watshavbo. Ni dzimindru dzakona, a di rana vapizane nyo khaguri, khavbovbo a ta hatha 12 nya avo. U nga gu ma dundruga malina yawe? Malina yawe gu diri Pedro, Andreya, Jakobe, Johane, Filipi, Bharitolomewu, Tomasi, Matewu, Jakobe gyanana gya Alifewu, Tadhewu, Simoni, ni Judha Sikariyoti.

Vatshavbo vava nya 12 va di gu gimbiyagimbiya ni Jesu. Hwane nyo ba a va hevbudzide, a di va rumeya gu ya tshumayela vonga. Jehovha a di va ninga tshivba nyo tutumise madhimoni ni gu vbanyisa vadwali.

Jesu a di rana vapostoli vaye nya 12 khuye dzipari dzaye nigu a di gu va tumba. Vafarisi va di gu wona vapostoli kha nga vathu nya mba  hevbula ni gu mba phasa gilo. Ganiolu, Jesu a di va hevbudza gu gira thumo a nga ba a va ningide. Va di hadzi manega ni Jesu ga dzitepo nya lisima ngudzu womini waye, nya nga tepo a nga ba a vbweta gu songwa khiyo ni hwane nya gufe gwaye. Gu fana ni Jesu, gutala nya ava nya 12 va diri va Galileya. Vambe vakona va di gu tshadhide.

Vapostoli va diri vathu nya mba vbeleya; va di gu gira sihoso. Dzimbe dzitepo va di gu ganeya nya mba pheya khu gu pimisa va bwe va gira silo nya mba sadi. Dzimbe dzitepo kha va nga ba va laphisa monyo. Va di ka va dwana khu gu vbweta guti gu khavo khu mani a gu wa lisima ngudzu gwawe. Ganiolu, va diri vathu nya vadi va nga ba va haladza Jehovha. Khavo va nga hadzi tula libandla nya Wukristo hwane nyo ba Jesu a bwelede ndzadzini.