Vafarisi va di gu mu nyenya Jesu nigu va di gu vbwetedzeya gighelo nyo mu mole khigyo. Va di gu khavo a nga vbanyisi vathu khu litshigu nya Sabhadho. Litshigu limwedo, Jesu a di mana mwama nyo khaguri a nga velegwa nari gikhumu na gu lomba zomola khu litshigu nya Sabhadho. A di embeya vapizane vaye khuye: ‘Wonani esi tshivba ya Nungungulu yi na phasago khidzo muthu yoyu.’ Jesu a di pata dzindrura dzaye ni mafu a gira maraga, khavbovbo a theya omu nya maho ya mwama yoyo. A mu embeya khuye: ‘Gimbiya u ya hamba gitsivanani gya Silowe.’ Mwama yoyo a di gira isoso, khavbovbo a pheya gu wona khu tepo nyo pheye womini waye.

Vathu va di hlamala ngudzu, khavo: ‘Mwama yoyu khandruye a nga ba a oloveya gu khala a lomba zomola ke, mwendro vo fana? Mwama yoyo a di khuye: ‘Kheni kamo, nyi nga velegwa na nyiri gikhumu!’ Vathu va di mu wudzisa khavo: ‘Khu ginani u wonago olu?’ Tepo a nga va embeya esi si nga dugeleya, va di hongola naye ga Vafarisi.

Mwama yoyo a di embeya Vafarisi, khuye: ‘Jesu a di theya maraganyana omu nya maho yangu, a vbedza a nyi ruma gu hongola nyi ya hamba khovbe. Nyi di hongola nyi ya hamba, nyi pheya gu wona.’ Vafarisi va di khavo: ‘Jesu a gu ba a vbanyisa vathu khu Sabhadho, tshivba a yi thumisago kha yiti khu ga Nungungulu.’ Ganiolu, vambe va di khavo: ‘Nari khatshi tshivba yaye kha yiti khu ga Nungungulu, na si si kodzi gu vbanyisa vathu ne vbadugwana.’

 Vafarisi va di ranisa vavelegi va mwama wule va ta va wudzisa khavo: ‘Si giregide kharini gu ka gyanana gyanu gi pheya gu wona?’ Vavelegi vaye va di thava, kholu Vafarisi va di tumbiside gu khavbo ni wevbini a khodwago ga Jesu a di hadzi tutumiswa sinagogani. Khu kharato, va di khavo: ‘Kha hi dziti. Mu wudziseni mwabune.’ Vafarisi va di gira siwudziso nya singi nyo bwe khuye: ‘Nyi mi embede satshavbo nyi si tigo. Khu ginani mu ngo nyi wudzisago simbe?’ Vafarisi va di zangari, va mu mola va ya mu rinya vbavbandze.

Jesu a di hongola ga mwama yoyo, a ya mu wudzisa khuye: ‘U ngu khodwa ga Mesiya?’ Mwama yoyo khuye: ‘Nari khatshi nyi ngu muti, nyi di hadzi khodwa gwaye.’ Jesu khuye: ‘Kheni Mesiya.’ Ina khandri wuwadi uwowo Jesu a nga wu yeyedza? Jesu khandri a di mu vbanyisa basi, ganiolu a di bwe a mu phasa gu khodwa ga Mesiya.