Hwane nyo ba gu vbindride gitepwana nyo khaguri Jesu na bhabhatisidwe, a di pheya gu tshumayela, khuye: ‘Mufumo wa Nungungulu wu vbohide.’ Tepo Jesu a nga ba a tshumayela Galileya ni Judha, a di gu landrisedwa khu vapizane vaye. Tepo Jesu a nga bweleya gidhoropanani gyaye nya mavelego Nazareta, a di hongola sinagogani a ya tula libhuku la Isaya a leri khu lito nyo khugege, khuye: ‘Jehovha nyi ningide liphuvbo nya guage gasi nyi tshumayela mahungu nya yadi.’ Si di gu thula ginani isoso? Si di gu thula gu khiso gilo nyo pheye egi Jehovha a nga mu ninga, liphuvbo nya guage gasi a tshumayela mahungu nya yadi, ambari olu vathu va nga ba va vbweta gu khavo a gira silewugiso. Khabvovbo, Jesu a di embeya gambe vathu, khuye: ‘Muhuno giprofeto gegi gi tadzisegide.’

Khu gulandreya, Jesu a di hongola Yiphwani ya Galileya, iyo a nga ya mana 4 vapizane va nga ba va goga dzindzandzi. A di va rana, khuye: ‘Hongoleni, nyi na mi hevbudza gu goga vathu.’ Vama vovo gu diri Pedro, Andreya, Jakobe ni Johane. Va di dzegeya gu diga thumo wawe nya gu goge ni gu rengisa dzindzandzi, va mu landreya. Va di gimbiyagimbiya Galileya gwatshavbo va tshumayela khu Mufumo wa Jehovha. Va di gu tshumayela dzisinagogani, omu nya dzibazari ni mudziruwani. Ni hayini omu va nga ba va hongola, va di gu landredwa khu vathu nya vangi. Esi Jesu a nga ba a gira si di phalalega ngudzu, si bwe si vboha ni Siriya.

Khu gu gimbiya nya tepo, Jesu a di ninga tshivba vapizane vaye nyo vbanyise vathu ni gu tutumisa madhemoni. Vambe a di gu gimbiyagimbiya navo tepo a nga ba a tshumayela khu lidhoropa ni lidhoropa, ni sidhoropanani. Jesu ni vapizane vaye va di gu sayiswa khu vanyamayi nya vangi nyo tumbege, nya nga Mariya Madhalena, Jowana, Suzana ni vambe.

Hwane nya gu Jesu a hevbudzide vapizane vaye, a di va ruma gu tshumayela. Tepo va nga ba va gimbiyagimbiya Galileya va tshumayela, vambe vathu nya vangi navo va di khala vapizane, va bhabhatiswa. Gu diri ni vathu nya vangi va nga ba va vbweta gu khala vapizane nyo bwe Jesu a va fananisa ni lithembwe li gu na ni dzimbewu dzi vbwetago gu havedwa. A di khuye: ‘Lombani Jehovha a rumeya vambe vathumi gasi va ta haveya dzimbewu.’ Khavbovbo, a di hatha 70 vapizane vaye a va ruma khu vavili vavili gu ya tshumayela Judhiya. Va di gu hevbudza vathu nya makhalelo  yatshavbo maningano ni Mufumo wa Nungungulu. Vapizane va Jesu va di wuya na va tsakide ngudzu na va vbweta gu bhuleya Jesu esi si nga dugeleya. Gi mwalo a nga hadzi gira Sathane gasi gu emisa thumo nyo tshumayele.

Jesu a di gira satshavbo si nga ba si vbwetega gasi a bweleya ndzadzini, gasi vapizane vaye va si kodza gu gira thumo wowu nya lisima. A di va embeya khuye: ‘Tshumayelani mahungu nya yadi mafuni gwatshavbo. Va hevbudzeni Lito la Nungungulu, mu bwe mu va bhabhatisa.’