Ga litshigu nyo khaguri hwane nya Phasika, Jesu ni vapizane vaye va di vbindra khu Samariya na va bweleya Galileya. Vbafuvbi ni lidhoropa la Sikari, Jesu a di ema ga wulanga wu ranwago pwani nambo wa Jakobe. Tepo a nga ba a hefemula, vapizane va di hongola va ya renga guhodza.

Gu dita nyamayi avba nya nambo a ta rega mati. Jesu a di mu embeya khuye: ‘Nyo lomba gu nyi ninga mati nyo seye.’ Nyamayi wule a di khuye: ‘Khu ginani u ganeyago ni eni? Eni nyi mu Musamariya phe. Kha wu dziti gu khuwe Vajudha kha va ganeyi ni Vasamariya?’ Jesu khuye: ‘Nari khatshi wo dziti gu khuwe kheni mani, u di hadzi nyi lomba mati nyo seye, eni nyi gu ninga mati nya womi.’ Nyamayi yoyo khuye: ‘Wo vbweta gu khuwe ginani?’ ‘Ne gilo nyo rege khigyo u mwalo.’ Jesu khuye: ‘Oyu a seyago mati nyi mu ningago, kha na nga tshuka apwa lidora gambe.’ Nyamayi yoyo a di khuye: ‘Pfhumu, nyi ninge mati yoyo.’

Jesu a di mu embeya khuye: ‘Gimbiya u ya dzega mwama wago, u wuya naye avba nambotunu.’ Nyamayi wule a di khuye: ‘Nyi mwalo mwama.’ Jesu khuye: ‘Khu liphi. U vbanyide ni 5 vama. Ambari oyu u gu naye olu khandri wago.’ Nyamayi khuye: ‘Nyi ngu si wona gu kheni u muprofeti. Ethu Vasamariya ho khodwa gu khethu gu vbwetega hi khozeya Nungungulu avba nya gigomo gegi. Ganiolu, Vajudha vari khavo gu vbwetega hi ya mu khozeya eyi Jerusalema basi. Nyi ngu khodwa gu kheni tepo a na tago Mesiya, a na hi hevbudza edzi hi yedego gu khozeya khidzo.’ Khavbovbo, Jesu a di ganeya silo nya gu a di si tshuki a ganeya, khuye: ‘Eni, kheni Mesiya.’

 Nyamayi wule a di vbiredza a bweleya dhoropani gwaye a ya embeya Vasamariya, khuye: ‘Nyi wonide Mesiya. A nguti satshavbo nya womi wangu. Hongoleni mu ya mu wona!’ Va di hongola naye namboni va ya engiseya Jesu na gu hevbudza.

Vasamariya va di rana Jesu gasi a ta khala dhoropani gwawe. A di vbedza matshigu mavili na gu va hevbudza, khavbovbo vathu nya vangi va di khodwa gwaye. Va di embeya nyamayi wule nya Musamariya, khavo: ‘Hwane nya gu mu engiseye mwama yoyu, hi ngu si wona kamo gu khethu khuye muvbanyisi nya litigo.’