Jesu ni vapostoli vaye va di gimbiya khu Kovani wa Kedhroni va hongola Gigomoni nya Miolivha. Gu diri mambagugya, nigu ngima wu di gu wonega watshavbo. Tepo va nga vboha thembweni ga Getsemani, Jesu a di va embeya khuye: ‘Tshalani avba, mu nga lali.’ Jesu a di hongola thembweni, a ya khidzima. A di gombeya ga Jehovha na garadzegide ngudzu, khuye: ‘Papayi, gu na girege gugola gwago.’ Jehovha a di rumeya ngilozi yi ta mu tiyisa. Tepo Jesu a nga bweleya ga vapostoli vaye, a di ya va mana na va lade. Khuye: ‘Wugani! Eyi khandri tepo nya gu mu lala! Yi vbohide tepo nya gu nyi ningedwa ga valala vangu.’

Nya mba hweya, a di vboha Judha nari ni vathu nya vangi ngudzu va nga ba vari ni dzixpadha ni mighomba. Judha a di gu guti omu Jesu a nga ba ari umo kholu va di gu oloveya gu hongola thembweni momo. Judha a di embede masotshwa gu khuye a di hadzi va yeyedza Jesu. A di dzegeya gu kongoma ga Jesu, a ya khuye: ‘Sewe Muhevbudzi,’ a mu bhejari. Jesu khuye: ‘Judha, khuwe u nyi ningeyago khu gu nyi bhejari?’

Jesu a di hidzimeya a wudzisa vathu khuye: ‘Khu mani mu mu vbwetago?’ Vathu va di khavo: ‘Ho vbweta Jesu wa Nazareta.’ Jesu khuye: ‘Kheni oyu.’ Vama vovo va di hidzimeya hwane va thega vbavbatshi. Jesu a di va wudzisa gambe, khuye: ‘Gasi khu mani mu mu vbwetago?’ Va pheledza gambe khavo: ‘Ho vbweta Jesu wa Nazareta.’ Jesu a hlamula khuye: ‘Nyi mi embede gu kheni, kheni. Digani vapizane vangu va hongola.’

Tepo Pedro a nga si pwisisa esi si nga ba si girega, a di homola xpadha a piya ndzeve ya mwama moyo nyo pwani khu Maliko, a nga ba ari githumi gya mupristi nya khongolo. Ganiolu, Jesu a di khuha ndzeve ya mwama yoyo a mu vbanyisa, a hegisa a embeya Pedro khuye: ‘Bweledza xpadha yoyo. Wo dwana khu xpadha, u na songwa khu xpadha.’ Masotshwa ma di mola Jesu ma mu hungeleya mawogo,  vapostoli va tutuma. Khavbovbo, vathu vale va hongola ni Jesu gaya ga Anasi, muthangeyi nya vapristi. Anasi a di mu gira siwudziso, a vbedza a mu rumeya ga Khayifasi, Mupristi nya Khongolo. Ganiolu, ginani gi nga dugeleya vapostoli?