Hwane nyo ba Jesu a wonegide ga vapostoli vaye khu tepo nyo pheye hwane nyo ba a wusidwe, Pedro a di hunga gu ya goga dzindzandzi Yiphwani ya Galileya. Tomasi, Jakobe, Johane ni vambe vapizane va Jesu va di hongola navo. Va di goga wutshigu watshavbo, ganiolu kha va mana gilo.

Ni dzimindru ngudzu, va di wona mwama nyo khaguri na emide vbavbandze nya yiphwa. A di va wudzisa, khuye: ‘Mu manide gilogyo?’ Avo va di hlamula, khavo: ‘Ahihi!’ Mwama yoyo a di khuye: ‘Rinyani gambe dzikhoga khu nyambade nya ngalava.’ Tepo va nga gira isoso, va di mola dzindzandzi nya dzingi ngudzu nyo bwe va tandrega ni gu dusa ngalava. Johane a di dzegeya gu dziti gu khuye mwama wule khu Jesu, khavbovbo khuye: ‘Khu Pfhumu!’ Pedro a di dzegeya gu ndraga a beya matini, a hambeya a duga vbavbandze funguni. Ava vambe vapizane va Jesu, va di landra Pedro khu ngalava.

Tepo va nga vboha vbavbandze, va di wona dzindzandzi ni dzipawu na si vawudwa niloni. Jesu a di va ruma gu resa dzindzandzi nyo khaguri gasi va  engedzeya ga edzi dzi nga ba dzi vawudwa gasi va hodza. A di va embeya, khuye: ‘Deluni hi ta hodza.’

Hwane nyo ba va vbedzide gu hodza, Jesu a di wudzisa Pedro, khuye: ‘U ngu nyi gola guvbindra thumo nyo goge dzindzandzi?’ Pedro khuye: ‘Ina Pfhumu. U ngu dziti gu khuwe nyi ngu gu haladza.’ Jesu khuye: ‘Hodzisa dzinvuta dzangu.’ Jesu a di mu wudzisa gambe, khuye: ‘Pedro, u ngu nyi gola?’ Pedro khuye: ‘Pfhumu, u ngu dziti gu khuwe nyi ngu gu gola.’ Jesu khuye: ‘Havisa dzinvuta dzangu.’ Jesu a di mu wudzisa gambe khu tepo nya wuraru, khavbovbo Pedro a di goroga, khuye: ‘Pfhumu, u nguti silo satshavbo. U ngu dziti gu khuwe nyi ngu gu gola.’ Jesu khuye: ‘Hodzisa dzinvuta dzangu.’ Khavbovbo, a di mu embeya khuye: ‘Simama gu nyi landreya.’