Tepo Jesu a nga ba ari ni vapostoli vaye omu nya sala ya vbatshani, a di va embeya khuye: ‘Wutshigu wa muhuno, mwatshavbo mu na nyi tutuma, mu nyi tshiya nyonga.’ Pedro a di khuye: ‘Eni kha nyi na nga tutuma! Ambari ava vambe vo gu tshiya, eni kha nyi na nga gu tshiya.’ Ganiolu, Jesu a di embeya Pedro khuye: ‘Na wu si gu embi khonge, u na nyi bomba guraru khuwe khu nyiti.’

Tepo masotshwa ma nga dzega Jesu ma hongola naye ga Khayifasi, gutala nya vapostoli va di phalalegide. Ganiolu, vavili vakona va di mu landride khu hwane na vari vbakari nya vathu. Moyo wakona gu diri Pedro. A di ya beya ndrangani ga Khayifasi a wora nilo. Kha nga olu a nga ba ari wulangani nyo wonegeye, githumi gya Khayifasi gi di wona Pedro, khigyo: ‘Nyi ngu guti uwe! U diri ni Jesu nuwe!’ Pedro a di hlamula khuye: ‘Ahihi, nyi diri mwalo naye! Kha nyi siti esi u ganeya khiso!’ A di hongola khu vbamwanya. Ganiolu, a di wonwa gambe khu gimbe githumi nya nyamayi, gi embeya vathu khigyo: ‘Mwama yoyu a diri ni Jesu!’ Pedro khuye: ‘Kha nyi muti ni gu muti Jesu yoyo wanu!’ Mwama nyo khaguri khuye: ‘Mu ngu tivana sa! Nya gupwa khu maganelelo yago. Wa guta khu Galileya nuwe nga Jesu.’ Ganiolu, Pedro a di sambanya khuye: ‘Kha nyi muti Jesu eni!’

Khu tepo yoyo kamo, gu di emba khonge. Pedro a di wona Jesu na dzuwuluga a mu khedza. A di dundruga malito ya Jesu, a vbisega ngudzu a duga vbavbandze a ya liya.

Ndrani nya tepo yoyo, madhota ma di hunga makungo nyo xuxe Jesu nyumbani ga Khayifasi. Ma di hungide gu songa Jesu. Olu ma di gu vbwetedzeya gighelo nya gu mu ninge khigyo nandru.

Khavbovbo, Khayifasi a di wudzisa Jesu khu gukongoma, khuye: ‘U Gyanana gya Nungungulu?’ Jesu khuye: ‘Ina.’ Khayifasi khuye: ‘Kha hi ngo vbweta gambe gighelo. Vade Nungungulu!’ Madhota yatshavbo ma di dzumeya, khayo: ‘Mwama yoyo gu vbwetega a songwa.’ Va di mu thureya, va mu veta dzipama, va mu sega maho, va mu veta khu mighomba, khavo: ‘Wo ba uri muprofeti, hi embeye gu khuwe khu mani a nga gu veta!’

 Na gu gide, va di dzega Jesu va hongola naye omu madhota ma nga ba ma tshangana umo, va ya mu wudzisa khavo: ‘U Gyanana gya Nungungulu?’ Jesu a di hlamula, khuye: ‘Mo ganeya kamo ulolo khenu nyi Gyanana gya Nungungulu.’ Va di mu ninga nandru nyo khavo a ngu valeteya, khavbovbo va mu dzega va hongola naye ga Pontiyo Pilato, ghovherinadhori wa Roma. Ginani gi nga girega khu gulandreya? Hi na si wona ga gipimo gi landreyago.