Sezareya, gu diri ni muthangeyi nya masotshwa nyo thavisege nyo pwani khu Korineliyo. A di gu gola gu phasa ngudzu sisiwana, nigu ambari olu a nga ba a siri Mujudha, Vajudha va di gu mu ninga ngudzu githawo. Korineliyo a di gu khodwa ga Jehovha nigu a di gu gombeya tepo yatshavbo. Litshigu limwedo, a di endredwa khu ngilozi yi ta mu embeya khiyo: ‘Nungungulu a yi pwide milombelo yago. Ruma vathu olu va hongola dhoropani ga Jope, avbo a gu romo Pedro, va ya mu lomba gu ata avba gaya gwago.’ Korineliyo a di dzegeya gu ruma vama vararu va hongola Jope. Wu diri pfhuka nya tanga nya 50 dzikilometro gu hongola sul.

Ndrani nya tepo yoyo, Pedro a di wona giwoniso na romo Jope. A di wona sirengo esi Vajudha va nga ba va himbedzedwa gu hodza, khavbovbo apwa lito na li mu ruma gu hodza. Pedro a di bomba, khuye: ‘Womini wangu watshavbo nyi si hodzi sirengo nyo nyenyeze.’ Lito li di khilo: ‘U nga ganeyi gu khuwe sirengo sesi si nyenyezide.’ Liphuvbo li di embeya Pedro, khilo: ‘Gu na ni vama vararu vbamwanya gwago. Gimbiya navo.’ Pedro a di hongola vbamwanya a ya wudzisa vama vovo gu khuye va di gu vbweta ginani. Va di hlamula khavo: ‘Hi di rumwa khu Korineliyo, muthangeyi nya masotshwa ya Roma. Gu vbwetega u hongola gaya gwaye Sezareya.’ Pedro a di va hakha kha nga vapfhumba vaye; a va ninga wulanga nyo lale. Khu mindru wakona,  Pedro a di hongola navo Sezareya, gumogo ni vandriyathu nyo khaguri va Jope.

Tepo Korineliyo a nga wona Pedro, a di mu khidzimeya. Ganiolu, Pedro a di mu embeya, khuye: ‘Khuga u ema! Aneni nyi muthu nga uwe. Nungungulu a nyi rumide guta avba gaya gwago, ambari olu ethu Vajudha hi si beyigo ndrangani nya muthu a sirigo Mujudha. Nga nyi embeya, ginani u nga nyi raneya igyo?’

Korineliyo a di embeya Pedro, khuye: ‘Ga 4 matshigu ma nga vbindra, nyi di gu gombeya ga Nungungulu, khavbovbo guta ngilozi yi ta nyi embeya gu khiyo nyi na rume vathu va ta gu rana. Nyo lomba gu kheni u nyi hevbudza mahungu ya Nungungulu.’ Pedro khuye: ‘Nyi hevbude gu kheni Nungungulu mwalo gihatheya. Vatshavbo ava va vbwetago gu mu khozeya, a ngu va dzumeya.’ Pedro a di va hevbudza silo nya singi khu Jesu. Liphuvbo nya guage li dita ga Korineliyo ni ga vathu vatshavbo a nga ba ari navo, khavbovbo va bhabhatiswa.