Vapostoli va engiside esi va nga rumwa khu Jesu, nya gu tshumayele mahungu nya yadi mafuni gwatshavbo. Khu mwaga nya wu 47 Matshiguni Yathu, vandriyathu va Antiyokiya va di ruma Pawulo ni Bharinabha gu endra va hongola va ya tshumayela. Vatshumayeli vovo nyo vbisege va di gimbiyagimbiya tigoni ga Aziya nya Mudugwana (oyu muhuno a gu litigo la Turquia), va tshumayela ga malanga nya nga Dheribhe, Listra ni Ikoniya.

Pawulo ni Bharinabha va di tshumayela vathu vatshavbo va di tshumayela sisiwana, vaphya mwendro ava va dandridego khu tanga. Vathu nya vangi va di dzumeya lisine khu Kristo. Tepo Pawulo ni Bharinabha va nga tshumayela Serijiyo Pawulo, ghovherinadhori wa Kipre, gu di dugeleya ndroyi nyo khaguri yi zama gu va digisa gu tshumayela. Pawulo a di embeya ndroyi yoyo, khuye: ‘Jehovha a na gu tsayisa.’ Khavbovbo, ndroyi yoyo yi difa maho. Tepo Serijiyo Pawulo a nga si wona isoso, a di khodwa ga Jehovha.

Pawulo ni Bharinabha va di tshumayela gwatshavbo va gimbiya khu ndranga ni ndranga, va tshumayela mudzibazarini, mudziruwani, ni mudzisinagogani. Tepo va nga vbanyisa gilima gya Listra, ava va nga si wona va di pimisa gu khavo Pawulo ni Bharinabha va diri vanungungulu, khavbovbo va di zama gu va khozeya. Ganiolu, va di va emisa, khavo: ‘Khozeyani Nungungulu basi! Ethu hi vathu,’ Gu dita Vajudha nyo khaguri va ta kutsedzeya vathu gu khavo va wugeya Pawulo. Vathu va di veteleya Pawulo khu siwindri, va mu kuruviseya va duga naye vbavbandze nya lidhoropa va ya mu tshiya iyoyo na va pimisa gu khavo fude. Ganiolu, Pawulo a di nga gu vbanya! Va di dzegeya guta vandriyathu va ta mu dzega va hongola naye dhoropani. Khu hwane, Pawulo a di bweleya Antiyokiya.

Khu mwaga nya wu 49 Matshiguni Yathu, Pawulo a di endra gambe a gimbiya a tshumayela. Tepo a nga bweleya a ya wuseya vandriyathu va  Aziya nya Mudugwana, a di gimbiya a tshumayela ga mambe mayigo ya hwindzo ga Europa. Hongode Atena, Efeso, Filipi, Tesalonika, ni mambe malanga. A di hongola ni Silasi, Luka ni limbe lidzaha nyo pwani khu Thimoti. Va di thuma vatshavbo gasi gu tula mabandla ni gu ma tiyisa. Pawulo vbedzide mwaga ni metadu nari Korinto na tiyisa vandriyathu. Tshumayede, a hevbudza a bwe a loveya malangaliya mabandla nya mangi. A di gu thuma gu vbaha matendra gambe. Khu gu gimbiya nya tepo, Pawulo a di bweleya Antiyokiya.

Khu mwaga nya wu 52 Matshiguni Yathu, Pawulo a di endra gambe khu tepo nya wuraru, na khuga khu Aziya nya Mudugwana. A di hongola ga malanga ya hwindzo ngudzu ya norte ga Filipi, khavbovbo a releya a hongola Korinto. Pawulo vbedzide myaga nya yingi Efeso na hevbudza, a vbanyisa vadwali a bwe a phasedzeya libandla. A di gu vega dziganelo gambe tshigu ni tshigu omu nya sala nya xikola nyo khaguri. Vathu nya vangi va di gu mu engiseya va bwe va vbindrugedza mavbanyelo yawe. Hwane nyo ba Pawulo a tshumayede mahungu nya yadi omu nya mayigo nya mangi, a di hongola Jerusalema.