Dhoropani ga Filipi gu diri ni gyagadzyana gi nga ba giri ni lidhimoni. Gyagadzyana gyogyo gi di gu sasula dzisolo khu gu phaswa khu lidhimoni lolo. Ava gi nga ba gi thuma gwawo, va di gu mana dzitsapawu nya dzingi khu thumo wowo nya gu sasule. Tepo Pawulo ni Silasi va nga hongola dhoropani ga Filipi, gyagadzyana gyogyo gi di va landriseya khu matshigu nya mangi. Lidhimoni li di gu gira gu gi ganeya khu lito nyo khugege, khigyo: ‘Vama vava vo thumeya Nungungulu a Khugegidego Ngudzu.’ Khu guhegisa, Pawulo a di embeya lidhimoni, khuye: ‘Khu lina la Jesu, khuga khavba ga gyagadzyana gegi!’ Lidhimoni li di khuga.

Tepo vapatrawu vagyo va nga wona gu khavo kha gi na nga va theleya gambe dzitsapawu, va di goroga ngudzu. Va di mola Pawulo ni Silasi va va yisa ga vathangeyi nya vakhongolo, va ya khavo: ‘Vama vava kha va engisi nayo, nigu lidhoropa latshavbo li ngu garadzega!’ Vathangeyi vale va di ruma vathu gu veta Pawulo ni Silasi va bwe va va khotheya pasoni. Gwardha nya lipaso yi di va bedza pasoni wulangani nyo ete ngudzu, wu gu na ni gidema yi bwe yi va hungeleya avba nya madhera.

Pawulo ni Silasi va di embeleya dzindzimo va dhumisa Jehovha, na va gu pwidwa khu simbe sibotshwa. Vbakari nya wutshigu, gu di manega girevareva nya gikhongolo ngudzu kavba ni avba, lipaso li di kutsungega gukhugeya vbatshani kala vbavbatshi. Malimba nya lipaso ma di tulega, dzikorente dzi nga ba dzi hungelede sibotshwa dzi di tshulega nigu madhera va nga ba va fasedwe ma duga. Gwardha nya lipaso yi di tutuma yi hongola pasoni yi ya mana gu khiyo malimba ma tulegide. Yi di dzega xipadha yi vbweta gu dzi songa, khu gu pimisa gu khiyo sibotshwa satshavbo si di tutumide.

Pawulo a di dzegeya gu mu embeya, khuye: ‘U nga dzi songi sa! Hatshavbo hi womo omu!’ Gwardha yi di tutuma yi ya khidzimeya Pawulo ni Silasi, yi va wudzisa khiyo: ‘Ginani nyi yedego gu gira gasi nyi vbanyiswa?’ Va di mu embeya, khavo: ‘Uwe ni ndranga yago gu vbwetega mu khodwa ga Jesu.’ Khavbovbo, Pawulo ni Silasi va di va hevbudza mahungu ya Jehovha; gwardha yoyo ni vatshavbo va ndrangani gwaye va di bhabhatiswa.