Sawule a diri Muroma a nga velegedwa Tarisu. A diri Mufarisi a nga ba a wuti gwadi Nayo nya Gijudha, nigu a di gu ma nyenya Makristo. A di gu moleya vama ni vanyamayi nya Makristo dzindrangani gwawe, a ya va khotheya pasoni. Tepo vathu nya litsoro va nga ba va songa mupizane Sitefane khu siwindri, a di romo nuye a khedziseya.

Ganiolu, Sawule kha nga ba a tsaka khu gu moleya Makristo ya Jerusalema basi. Khu kharato, a di hongola ga mupristi nya khongolo a ya lomba gu khuye a mu ruma gu hongola dhoropani ga Dhamasko gasi a ya moleya Makristo ya iyoyo. Tepo Sawule a nga ba a vboha Dhamasko, a di wona gungangameya khavba ni avba, wu wenengedza gwatshavbo avba a nga ba a romo, khavbovbo a thega vbavbatshi. A dipwa lito na li khilo: ‘Sawule, khu ginani u nyi tshanisago?’ Sawule a di wudzisa khuye: ‘Khuwe mani?’ Lito li di mu hlamula khilo: ‘Kheni Jesu. Beya omu Dhamasko, u na ya embedwa esi u yedego gu gira.’ Khu gitepwana gile, Sawule a difa maho. Khu kharato, si lombide gu va mu pharedzeya khu libogo gasi a beya dhoropani.

Dhoropani ga Dhamasko gu diri ni Mukristo nyo tumbege nyo pwani khu Ananiya. Jesu a di embeya Ananiya khomu nya giwoniso, khuye: ‘Dzi dongiseye u hongola ruwani yi ranwago gu pwani Nyo Lulame, u hongola gaya ga Judha u ya vbweta mwama moyo nyo pwani khu Sawule.’ Ananiya a di khuye: ‘Pfhumu, nyi ngu yiti mithumo yatshavbo ya mwama yoyo! A gu moleya vapizane vago a va khotheya pasoni!’ Ganiolu, Jesu khuye: ‘Gimbiya ga Sawule. Nyi mu hathide gasi a tshumayela mahungu nya yadi ga vathu nya mayigo nya mangi.’

Khu kharato, Ananiya a di hongola ga Sawule a ya mu embeya, khuye: ‘Sawule, ndriyangu, Jesu a nyi rumide guta gu tula maho.’ Sawule a di dzegeya gu tulega maho, a pheya gu wona. A di hevbula khu Jesu, khavbovbo a pheya gu mu landreya. Kha nga olu a nga ba a bhabhatisidwe kha nga Mukristo, Sawule a di pheya gu tshumayela omu nya dzisinagoga gumogo ni Makristo makwawe. Nga  dundrugeya edzi va nga hlamala khidzo Vajudha tepo va ngapwa gu pwani Sawule a di gu hevbudza vathu khu Jesu! Va di khavo: ‘Mwama yoyu khandruye a nga ba moleya vapizane va Jesu gani?’

Sawule a di khala myaga miraru Dhamasko a tshumayela vathu. Vajudha va di gu mu nyenya Sawule. Khu kharato, va di luga mano nya gu mu songe. Ganiolu, vandriyathu va di sipwa isoso, khavbovbo va mu phasa gu duga khu dhoropani gasi a si songwi. Va di mu bedza omu nya rava nya wukhongolo va mu reledza vbavbatshi khavba nya muru nya lidhoropa.

Tepo Sawule a nga hongola Jerusalema, a di ya zama gu tshangana ni vandriyathu. Ganiolu, va di gu mu thava. Mupizane nyo khaguri nyo pwani khu Bharinabha a di hongola ni Sawule ga vapostoli a ya va gira va khodwa gu khavo Sawule a di gu vbindrugedzide kamo. Sawule a di pheya gu tshumayela mahungu nya yadi ni libandla la Jerusalema khu sighingi. Khu hwane nya tepo, a di tidwa kha nga Pawulo.