Tepo mupostoli Johane a nga khotedwa pasoni gidwani gya Patimosi, Jesu a di mu yeyedza 16 siwoniso mwendro dzifotu nya silo si nga hadzi dugeleya teponi yi tago. Siwoniso soso si yeyedzide edzi lina la Nungungulu li na agiswago khidzo, edzi Mufumo wa Nungungulu wu na tago khidzo, ni edzi gugola gwaye gu na giregago khidzo mafuni ni ndzadzini.

Ga giwoniso nyo khaguri, Johane a di wona Jehovha na ari vba gikhalutuno gyaye nya wufumu nyo ngangameye ndzadzini, na ari ni 24 madhota ma ambadego sombo nya guage ni sihugo nya wufumu nya ouro. Madhota yaya nya 24 nya ayo ma di khidzima mbeli ga Jehovha ma mu khozeya. Ga gimbe giwoniso, Johane a di wona vathu nya vangi ngudzu nya mayigo yatshavbo ni malimi yatshavbo na va khozeya Jehovha. Va di gu sayiswa khu Nvutana, a gu Jesu, a bwe a va yisa matini nya womi. Ga gimbe giwoniso a gi wonidego khu hwane nya tepo, a di wona Jesu na pheya gu fuma kha nga Pfhumu ndzadzini na ari ni 24 madhota. Ga giwoniso gi nga landreya, Johane a di wona Jesu na dwana ni draghawu ni madhimoni yaye. Draghawu yoyo khu Sathane. Jesu a di va tutumisa khu ndzadzini vata mafuni.

 Johane a di vbedza a wona yimbe fotu nyo mbure. Avba nya fotu yoyo, a di wona Nvutana ni ava nya 144 000 na va emide Gigomoni gya Siyoni gya ndzadzini. A di wona gambe ngilozi na yi vbuvba yi dzulugeya mafu yi embeya vathu gu khiyo va thava Nungungulu va bwe va mu ninga wuzundzo.

Avba nya giwoniso gi nga landreya, a di wona nyimbi nya Harimagedhoni. Avba nya nyimbi yoyo, Jesu ni masotshwa yaye va di pala Sathane ni mifumo yaye yatshavbo. Avba nya giwoniso nyo hegise, a di wona ndzadzini ni mafuni na guri ni gurula nyo vbeleye. Ga tepo yoyo, Sathane ni vatshavbo vale va mu seketeyago na va fuvisidwe. Vatshavbo ndzadzini ni mafuni kha va hagani khu lina la Jehovha, va gu li wona na li agide va bwe va khozeya uye enga.