Thimoti a diri lidzaha nya Mukristo wa libandlani la Listra. Papayi waye a diri muGreki; mamayi waye a diri Mujudha. Mamayi waye Ewunise ni vhovho waye Loyidhe va phede gu mu hevbudza khu Jehovha na ngari gyanana.

Tepo Pawulo a nga endreya Listra ga lipfhumba laye nya wuvili nya gu gimbiye a tshumayela, a di ya wona gu khuye Thimoti a di gu va gola ngudzu vandriyathu nigu a di gu gola ngudzu gu va phasa. Pawulo a di dzega Thimoti a pheya gu gimbiyagimbiya naye omu nya mapfhumba yaye. Khu gu gimbiya nya tepo, Pawulo a di hevbudza Thimoti thumo nyo tshumayele ni gu hevbudza mahungu nya yadi.

Gwatshavbo omu Pawulo ni Thimoti va nga ba va hongola, va di gu thangedwa khu liphuvbo nya guage. Ga wutshigu nyo khaguri, Pawulo a di woniswa giwoniso nyo khaguri. Avbo nya giwoniso gyogyo, a di wona mwama nyo khaguri na mu rana gu hongola Makedhoniya gasi a ya va phasa. Pawulo, Thimoti, Silasi ni Luka va di hongola Makedhoniya va ya tshumayela ni gu emisa mabandla.

Tesalonika li nga ba liri lidhoropa la Makedhoniya, vathu nya vangi nya vama ni vanyamayi va di khala Makristo. Ganiolu, Vajudha nyo khaguri va di pheya gu manega ni lidiwo khesi Pawulo ni dzipari dzaye va nga ba va gira. Va di rana vathu nya vangi va ta mola vandriyathu vovo va hongola navo ga dzipfhumu nya lidhoropa, va ya khavo: ‘Vama vava valala nya mufumo wa Roma.’ Pawulo ni Thimoti va diri vbafuvbi ni gu songwa. Khu kharato, va di tutuma va hongola Bhereya ni wutshigu.

Vathu va Bhereya va di gu dzina ngudzu gupwa mahungu nya yadi. Vagreki ni Vajudha nyo khaguri va Bhereya va di khodwa. Ganiolu, tepo va ngata Vajudha nyo khaguri va Tesalonika va ta wusa ligwaha, Pawulo a di hongola Atena. Thimoti ni Silasi va di tshala Bhereya va tiyisa vandriyathu. Khu gu gimbiya nya tepo, Pawulo a di ruma Thimoti gu bweleya Tesalonika a  ya phasa vandriyathu guti ndziya nya gu emisane ni dzitshanisa va nga ba va tshangana nadzo. Khu hwane nya tepo, Pawulo a di ruma Thimoti gu ya wuseya mambe mabandla a bwe a tiyisa vandriyathu.

Pawulo a di embeya Thimoti, khuye: ‘Ava va vbwetago gu thumeya Jehovha va na tshaniswa.’ Thimoti tshanisidwe a bwe a khothedwa pasoni khu kotani nya gukhodwa gwaye. A di gu tsaka khu lithomo laye nya gu yeyedze gu khuye tumbegide ga Jehovha.

Pawulo a di embeya Makristo ya Filipi, khuye: ‘Nyi ngu mi rumeleya Thimoti. A na mi hevbudza gu vbanya kha nga sithumi sa Jehovha a bwe a mi hevbudza gu tshumayela.’ Pawulo a di gu mu tumba Thimoti. Va diri dzipari nigu va thumide vatshavbo khu myaga nya yingi.