Hwane nya 10 matshigu Jesu na bwelede ndzadzini, vapizane vaye va di hakha liphuvbo nya guage. Gu diri Pentekosta nya 33 Matshiguni Yathu, nigu vathu va nga ba vata khu malangani nyo hambanehambane va di tshanganide Jerusalema gasi va gira festa. Gu diri ni 120 vapizane va Jesu va nga ba va tshanganide omu nya sala ya vbatshani. Gu di girega gilo nyo hlamadzise ngudzu khavba ni avba. Khu vbatshani nya mihungo ya vapizane va Jesu gu di wonega gilo nyo fane ni nilo, vatshavbo va pheya gu ganeya malimi nyo hambanehambane. Omu nya nyumba yatshavbo gu di pwala ligwaha nya likhongolo nyo fane ni phuvbo nya yikhongolo.

Ava va nga ba va dzude Jerusalema na vata khu mambe mayigo, va dipwa ligwaha lolo, va tutuma va hongola nyumbani momo gasi va ya wona esi si nga ba si girega. Va di hlamala ngudzu tepo va ngapwa vapizane va Jesu na va ganeya malimi nyo hambanehambane. Va di khavo: ‘Ava va guta khu Galileya phe. So kodzega kharini gu va ganeya malimi yathu?’

Khavbovbo, Pedro ni vambe vopostoli va di ema mbeli nya vathu, va va tshamuseya edzi Jesu a nga songwa khidzo nigu khavo Jehovha mu  wuside khu ga vafudego. Va bwe khavo: ‘Olu Jesu womo ndzadzini khu nyamudye ga Nungungulu. A di hi guhuleya liphuvbo nya guage a nga hi tumbisa. Khilo li girago gu mu wona ni gupwa gilewugiso gegi.’

Vathu va di tsakiswa ngudzu khesi Pedro a nga ganeya, va mu wudzisa khavo: ‘Ginani hi yedego gu gira?’ A di va embeya khuye: ‘Dzi layeni ga sighoho sanu mu bwe mu bhabhatiswa linani la Jesu, anenu mu na hakha giningwa gegi nya liphuvbo nya guage.’ Khu litshigu lolo, gu di bhabhatiswa 3000 vathu. Gukhugeya avbovbo, vapizane va Jesu va di pheya gu engedzeleyana va tala ngudzu khu guvbiredza Jerusalema. Vapostoli va di tula mabandla nya mangi khu gu phaswa khu liphuvbo nya guage, gasi va hevbudza umo vapizane vovo vatshavbo esi Jesu a nga ba va rumide.