Litshigu nyo khaguri Evha nari enga, gu dita nyoga yi ta ganeya naye. Yi di khiyo: ‘Ina lisine nya gu Nungungulu a mi rumide gu mba hodza mihandro nya misimbo yatshavbo?’ Evha a di hakha khuye: ‘Hi nga hodza mihandro nya misimbo yatshavbo, ganiolu moyo basi hi gu mba yela gu hodza. Ha gu hodza, hi nafa.’ Nyoga yi di mu hakha, khiyo: ‘Kha mu na ngafa! Gasi gu ganeya lisine, litshigu mu na hodzago, mu na fana ni Nungungulu.’ Ina ilolo li diri lisine? Ahihi, ma diri malipha. Ganiolu, Evha a di khodwa malipha yaya. Tepo ni tepo a nga ba a khedza handro wule, a di gu engedzeya gu wu dogoreya. Uye a di hodza handro a bwe a ninga nuye Adhamu. Adhamu a di gu dziti gu khuye va gu mba engisa Nungungulu va nafa. Ambari olu a nga ba a dziti, Adhamu a di hodza handro.

Ni siyambo nya litshigu lolo, Jehovha a di ganeya ni Adhamu ni Evha. A di va wudzisa gu khuye khu ginani va nga ne gu mu engisa. Evha a di singedza nyoga; Adhamu a singedza Evha. Khu kotani nya olu Adhamu ni Evha va nga mba engisa Jehovha, a di va tutumisa khu thembweni. Gasi a tiyisega gu khuye kha va na nga bweleya gambe thembweni, Jehovha a di vega dzingilozi ni xiphadha vbamwanya.

Jehovha a di tumbisa gu tsayisa oyu a nga senga Evha. Khu lisine, khandri nyoga yi nga ganeya ni Evha. Jehovha kha gira dzinyoga na dzi gu ganeya. Ngilozi nya guvivbe yi nga gira gu nyoga yi ganeya. Yi giride isoso gasi gu kalaveya Evha. Ngilozi yoyo khu Sathane Dhiyabhulosi. Mindru wa tshigu, Jehovha a na fuvisa Sathane gasi a si kutsedzeyi gambe vathu gu gira silo nyo vivbe.