Nowa, ni ndranga yaye ni sirengo va di beya omu nya litaro. Jehovha a di sega lidimba nya litaro, khavbovbo yi pheya guwa ndzadzi. Yi diwa ndzadzi ngudzu kala litaro li pheya gu deluga. Khu guhegisa, mafu yatshavbo ma di tala khu mati. Vathu vatshavbo nyo vivbe va nga ba va romo vbavbandze nya litaro va difa. Ganiolu, Nowa ni ndranga yaye va di vbuluga ndrani nya litaro. Nga dundrugeya khedzi va tsakidego khidzo kholu va nga engisa Jehovha!

Ndzadzi yi diwa 40 matshigu, wutshigu ni mihani; yi vbedza yi khamuga. Mati ma divbwa vbadugwana-vbadugwana. Khu guhegisa, litaro li di ema vbatshani nya sigomo. Kha nga olu gu nga ba gu ngari ni mati mafuni gwatshavbo, Nowa ni ndranga yaye va di simama gu khala omu nya litaro.

Mafu ma di banga vbadugwana-vbadugwana. Nowa ni ndranga yaye va khade mwaga ni guvbindra omu nya litaro. Khavbovbo, Jehovha a di va ruma gu duga. Tepo va nga duga vbavbandze, va dzi pwide na vari mafuni nya maphya. Va di mu bonga ngudzu Jehovha kholu a va vbulugisidego, va bwe va yeyedza gubonga gogo khu gu mu gireya muphaso.

Jehovha tshakide ngudzu khu muphaso wowo. A di va tumbisa gu khuye kha na nga tshuka a fuvisa litigo khu talo nya mati. Kha nga gifungo nya gitumbiso gyaye, a di wonegisa arco-íris nya gupheye ndzadzini. U di nga tshuga u wona arco-íris?

Jehovha a di embeya Nowa ni ndranga yaye gu khuye gu vbwetega va velega sanana va tadza mafu.