Hwane nya gu ba Adhamu ni Evha na va dugide khu thembweni ga Edheni, va di velega sanana nya singi. Gyanana gyawe nya koma, Kayimi, gi diri mulimi, egi nya wuvili, Abheli, gi diri musoti

Litshigu nyo khaguri Kayimi ni Abheli va di gira miphaso ga Jehovha. U ngu dziti gu khuwe ginani muphaso? Ningelo wu giredwago Nungungulu. Jehovha a di tsaka ngudzu khu muphaso wa Abheli, ganiolu uwo wa Kayimi kha wu tsakeya. Isoso si di mu zangarisa ngudzu Kayimi. Jehovha a di gengedza Kayimi gu khuye tshukwana a dzi woneya kholu zanga yaye yi di hadzi mu gira a gira silo nyo vivbe. Ganiolu, Kayimi kha theya kota khu isoso.

Kayimi a di embeya Abheli gu khuye: ‘Hongole thembweni.’ Kha nga olu va nga ba vari vonga thembweni mule, Kayimi a di wugeya ndriyaye a mu songa. Ginani egi Jehovha a nga hadzi gu gi gira khu kotani nya isoso? Jehovha a di tsayisa Kayimi khu gu mu hambanisa ni gilongo gyaye. Uye gima na sa dzumeledwa gu wuya.

 Gyomo hi gi hevbulago avba? Ethu hi nga pheya gu goroga a bari gu gilo nyo khaguri kha gi gimbiyi gwadi nga edzi hi nga ba hi pimisa khidzo. Ginani egi Jehovha a nga gira? Jehovha a di tsayisa Kayimi khu gu mu tutumisa a si khali gambe ni valongo vaye, nigu kha nga ba a yede gu bweleya gambe. Ginani hi gi hevbulago avba nya gigiro gegi? Ha gu hevbula gu khethu silo si nga tshuka si si gimbiyi khedzi hi nga ba hi si virede khidzo. Khu kharato, ha gu tshuka hipwa gu khethu hi ngu gweledwa khu zanga — mwendro vambe va gu si tugula va vbedza va hi gengedza — i tshukwana hi dzegeya gu zama gu dzi phara na hi si gu ghoheteyi silo.

Kha nga olu Abheli a nga ba a gola Jehovha ni gu bwe a gira silo nya sadi, Jehovha a na mu dundruga gambe ni gambe. Tepo Nungungulu a na vbindrugedzago mafu ma khala paradhesi, a na wusa Abheli a vbanya gambe.