Vbafuvbi ni Bhabheli, gu diri ni lidhoropa li nga ba li ranwa pwani i Uri. Vathu vakona va di gu khozeya vanungungulu nya vangi, va di si khozeyi Jehovha. Ganiolu Uri, gu diri ni mwama a nga ba a khozeya Jehovha basi. A di gu ranwa pwani khu Abrahama.

Jehovha a di embeya Abrahama, khuye: ‘Khuga khu gaya gwago ni valongo vago, u hongola ga litigo nyi na gu yeyedzago.’ Jehovha a di bwe a mu tumbisa gu khuye: ‘Nyi na wusa khuwe litigo nya vathu nya vangi, nigu nyi na kategisa vathu nya vangi tigoni khu kotani gwago.’(NM)

Abrahama kha nga ba a guti omu Jehovha a nga ba a mu ruma gu hongola umo, ganiolu uye a di gu tumba Jehovha. Khu kharato, Abrahama, ni mwangadzi waye Sara, ni papayi waye Tera ni gyanana gya ndriyaye Loti, va di engisa Jehovha va rwaleya dzithomba dzawe va pheya lipfhumba nya likhongolo.

 Abrahama a diri ni 75 myaga tepo uye ni ndranga yaye va nga vboha tigoni omu Jehovha a nga ba a vbweta gu khuye va li wona. Litigo leli li di gu ranwa pwani Khanani. Nari iyoyo, Jehovha a di ganeya ni Abrahama a mu tumbisa gu khuye: ‘Nyi na ninga litigo leli situgulwana sago.’ Ganiolu, Abrahama ni Sara va di gumbide nigu va diri mwalo gyanana. Ina ka, Jehovha a di hadzi gi tadzisa kharini gitumbiso gegi?