Loti a di gu khala ni tiyu waye Abrahama tigoni ga Khanani. Khu guhegisa, Abrahama ni Loti va di manega ni sirengo nya singi ngudzu nyo bwe va hamuga ni wulanga nya gu si hodza umo. Abrahama a di embeya Loti, khuye: ‘Kha si ngo kodzega gu hi vbanya gumogo wulanga wumowo. Tshukwana u hatha wulanga u tsakeyago gu ya khala umo, aneni nyi na hongola wumbe wulanga.’ Isoso si di gu yeyedza gu khiso Abrahama a diri muthu nya wadi, khandridzo?

Loti a di wona wulanga nya gumbure vbafuvbi ni Sodhoma. Gu diri ni mati nya mangi ni mwasi nyo mbure. Khu kharato, a di hatha wulanga wowo, a hongola a ya khala iyo ni ndranga yaye.

Vathu va Sodhoma ni Ghomora va diri ni mavbanyelo nya guvivbe. Khu lisine, va diri ni mavbanyelo nya guvivbe ngudzu nyo kala Jehovha a wona gu khuye tshukwana ma fuviswa madhoropa yoyo. Ganiolu, Nungungulu a di gu vbweta gu vbulugisa Loti ni ndranga yaye. Khavbovbo, uye a di rumeya dzingilozi dzimbili dzi ya va gengedza, khidzo: ‘Vbiredzani mu khuga dhoropani momu! Jehovha a ngu hadzi gu li fuvisa.’

Loti kha dzegeya gu duga. A di gira mihuni. Khu kharato, dzingilozi dzi di mola Loti, ni mwangadzi waye, ni sagadzyana saye sa sivili khu libogo dzi va dusa dhoropani mule khu guvbiredza, dzi mu embeya khidzo: ‘Dugani khu gu tutuma, gasi mu sifi! Mu nga khedzi hwane. Mo khedza hwane, mu nafa!’

Tepo va nga vboha dhoropani gu ranwago pwani Zowari, Jehovha a di wisa enxofre ni nilo Sodhoma ni Ghomora. Madhoropa yale ya mavili ma di  tshungunudwa hayo bhi. Tepo mwangadzi wa Loti a nga diga gu engisa Jehovha a khedza hwane, a di vbindugedza a khala giruga nya munyu! Ganiolu, Loti ni sagadzyana saye va di vbulugiswa kholu va engiside Jehovha. Va vbisegide ngudzu kholu ngadza Loti a nga ne gu engisa. Ganiolu, va di tsakide kholu va engisidego sileletelo sa Jehovha.