Jehovha a di tumbisa Jakobe gu khuye a di hadzi mu vhikeya kha nga edzi a nga vhikeya khidzo Abrahama ni Isaki. Jakobe a di ya khala Harani, iyo a nga dzega nyamayi, a velega sanana, a bwe a ghanya ngudzu.

Jehovha a di hegisa a embeya Jakobe gu khuye: ‘Bweleya omu nya litigo u nga velegedwa umo.’ Jakobe ni ndranga yaye va di pheya lipfhumba nya likhongolo nyo bweleye gaya. Na va nga gu hongola, Jakobe a di khingwa khu vathu nyo khaguri va ta mu embeya gu khavo: ‘Ndriyago Esawu a nguta, a guta ni 400 vama!’ Jakobe a pimisa gu khuye Esawu adzina a di gu kasari uye ni ndranga yaye. Khu kharato, a di gombeya ga Jehovha, khuye: ‘Jehovha, u nga digi ndriyangu a nyi songa.’ Khu litshigu li nga landreya, Jakobe a di rumeya sifuyo nyo khaguri ga Esawu — dzinvuta, dziphongo, dzimombe, dzikamelo ni dziburu.

Ni wutshigu wakone, Jakobe a di wona ngilozi nari enga! Ngilozi yi di pheya gu dwana naye. Va di dwana kala gugya. Ambari olu Jakobe a nga bayiswa, kha yi diga ngilozi yile. Ngilozi yi di khiyo: ‘Nyi dige nyi hongola.’ Ganiolu, Jakobe a di hlamula khuye: ‘Kha nyi dzini! Kha nyi na nga gu diga u hongola na u si nyi kategisi.’

Khu guhegisa, ngilozi yi di kategisa Jakobe. Khavbovbo, Jakobe a di dzegeya gu si wona gu khuye Jehovha na sa diga Esawu a mu gireya guvivba.

Ni dzimindru dzakona, Jakobe a di khedza mbeli nari hwindzwana, khavbovbo a wona Esawu ni 400 vama. Jakobe a di tshiya ndranga yaye hwane a thanga a ya khidzimeya ndriyaye 7 dzitepo. Esawu a di tutumeya  Jakobe a ya mu wugareya. Khu wuvili wawe va di liya va vbedza va divaleyana. Wo pimisa gu khuwe Jehovha a dzi pwide kharini khu gu wona edzi Jakobe a nga gi lulamisa khidzo gigaradzo gegi ni ndriyaye?

Khavbovbo, Esawu a di bweleya gaya gwaye, Jakobe nuye a simama ni lipfhumba laye. Jakobe a diri ni 12 sanana. Malina yaso gu diri Rubheni, Simiyoni, Levhi, Judha, Dhani, Nafitali, Gadhi, Aseri, Isakari, Zebhuloni, Josefa ni Bhejami. Gimwegyo nya sanana sesi — a gu Josefa — thumisidwe khu Jehovha gasi gu vbanyisa vathu vaye. U ngu dziti gu khuwe khu ndziya muni? Hi na si wona.