Hwane nya talo nya mati, sanana sa Nowa ni vagadzi vaso va di velega sanana nya singi. Dzindranga dzawe dzi dandra, va pheya gu phalalega ni mafu yatshavbo, kha nga edzi Jehovha a nga ba a va embede khidzo.

Ganiolu vambe kha va engisa Jehovha. Avo va di khavo: ‘Hongoleni hi vbahani lidhoropa gasi hi khala umo. Hi na vbaha predhiyu nyo laphe kala ndzadzini, gasi gu tidwa mafuni gwatshavbo.’

 Jehovha kha tsaka khesi va nga ba va vbweta gu gira. Khu kharato, a di va thindrekisa. U ngu dziti gu khuwe si giride kharini? A di va gira va ganeya malimi nyo hambane khavba ni avba. Kha nga olu va nga ba va si pwisisani, va di ema gu vbaha. Lidhoropa eli va nga ba va vbaha li di ranwa Bhabheli, li tulago gu ‘Gu mba pwanana.’ Vathu va di pheya gu swayegeya mafuni gwatshavbo. Ganiolu, va simama gu gira silo nyo vivbe omu va nga ba va khala umo. Ina womo a nga ba a haladza Jehovha? Hi na si tugula omu nya gipimo gi landreyago.