Mosi a di tumbisa Faro khuye kha na nga zama gu wonana gambe naye. Ganiolu na si gu khugi a hongola, a di embeya Faro khuye: ‘Vbakari nya wutshigu, sikhwatana satshavbo nya matewula sa Vaegipto si nafa, gukhugeya ga gyanana gyago ni esi nya sithumi sago.’

Jehovha a di embeya Vaisrayeli gu va phula guhodza nyo hathege. A di khuye : ‘Songani nvuta mwendro phongo nya matuni nya mwaga moyo, mu todzeya novba wakone omu nya myanya nya malimba yanu. Vawulani nyama yakone, mu hodza ni dzipawu nya mba thedwa livhirina. Ambalani, dzisandaliya dzanu, mu khala na mu dongide gu hongola. Nyi na mi tshudzisa wutshigu wa imuhuno.’ Nga dundrugeya khedzi va nga tsaka khidzo Vaisrayeli!

Vbakari nya wutshigu, ngilozi ya Jehovha yi di hongola dzinyumbani dzatshavbo dza Vaegipto. Omu nya dzindranga dzi nga mba todzedwa novba vbamwanya, ngilozi yi di songa gyanana nya gikhwatana nya koma. Ganiolu, omu nya dzindranga dzi nga ba dzi todzedwe novba, ngilozi yi di vbindra khu vbatshani. Omu nya dzindranga dzatshavbo dza Vaegipto, edzi nya sisiwana ni sighanyi, gu difa gyanana. Ganiolu, ne gyanana gimwegyo nya Vaisrayeli gi ngafa.

Gyanana gya Faro nigyo gi di songwa. Faro kha si kodza gu si timiseya isoso. A di dzegeya gu embeya Mosi ni Aroni khuye: ‘Khugani mu hongola. Gimbiyani mu ya khozeya Nungungulu wanu. Dzegani sirengo sanu mu hongola!

 Vaisrayeli va di duga khu Egipto ngima na wu di safa, va hongola ni dzindranga dzawe ni gilongo gyatshavbo. Va diri 600 000 vama, ni vanyamayi ni sanana nya singi. Va hongode ni vathu nya vangi va nga ba va siri Vaisrayeli gasi gu anavo va ya khozeya Jehovha. Khu guhegisa, Vaisrayeli va di tshudzisidwe!

Mwaga ni mwaga, Vaisrayeli va di yede gu gira festa nyo hathege, gasi va dundruga esi Jehovha a nga gira gasi gu va vbulugisa. Festa yeyi yi di gu ranwa pwani Phasika.