Vaisrayeli va di gu gurumedzwa gu thuma ngudzu Egipto. Jehovha a di rumeya Mosi ni Aroni va hongola ga Faro gasi va ya mu embeya gu khavo: ‘Diga vathu vangu va ya nyi khozeya giwulani.’ Faro a di hlamula khu matshandza khuye: ‘Nyi mwalo tepo ni esi Jehovha a ganeyago, kha nyi na nga va diga Vaisrayeli va hongola.’ Khavbovbo, a di va engedzeya thumo, a va gurumedza gu thuma silo nyo lemeye ngudzu. Jehovha a di hunga gu mu phwinya giwungu Faro. U ngu dziti gu khuwe giride kharini? A di resa 10 mitungu Egipto. Jehovha a di embeya Mosi khuye: ‘Faro kha nyi engisi. Mindru ni dzimindru, a na hongola Tsongoni wa Nilo. Gimbiyani mu ya mu embeya khenu olu u nga bomba gu diga vathu vangu va hongola va ya nyi khozeya, mati yatshavbo nya Tsongo wa Nilo ma na vbindrugedza ma khala novba.’ Mosi ni Aroni, va di engisa va hongola ga Faro. Faro a di wona Aroni na veta mati khu ndronga yaye, khavbovbo mati ma di vbindrugedza ma khala novba. Tsongo wu di pheya gu nunga, dzindzandzi dzifa. Tsongoni gu diri mwalo mambe mati nya yadi gasi va seya. Ambari ulolo, Faro a di gu simama gu bomba gu diga Vaisrayeli va hongola.

 Hwane nya 7 matshigu, Jehovha a di rumeya gambe Mosi ga Faro a ya mu embeya khuye: ‘Wa gu mba diga vathu vangu va hongola, tigoni ga Egipto gu na tala khu minyakhele.’ Faro kha dzumeya gu diga Vaisrayeli va hongola. Aroni a di khusedza ndronga yaye, khavbovbo litigo li tala khu minyakhele. Vathu va di mana minyakhele dzinyumbane gwawe, dzikamani dzawe, ni omu nya sombo sawe. Gu diri ni minyakhele malangani yatshavbo! Faro a di embeya Mosi khuye, lomba Jehovha gasi gu a dusa tungu wowu. Kholu tumbiside gu khuye a na diga Vaisrayeli va hongola. Khu kharato, Jehovha a di emisa tungu. Vaegipto va di wungeledzeya dzinyandra ni dzinyandra nya minyakhele nya gufe. Litigo li di pheya gu nunga. Ganiolu, ga tepo yeyi gambe, Faro a di bomba gu diga Vaisrayeli va hongola.

Khavbovbo, Jehovha a di embeya Mosi khuye: ‘Embeya Aroni a veta mafu khu ndronga yaye. Kudzudzwane wu na vbindrugedza wu khala wududu.’ Khadu-khadu, wududu wowo wu di phalalega ni litigo latshavbo. Faro a di embedwa khu vathu vaye khavo: ‘Tungu wowu wa guta khu ga Nungungulu.’ Ganiolu, Faro a di simama gu bomba gu diga Vaisrayeli va hongola.