Mosi ni Aroni va di bweleya ga Faro va ya mu embeya esi Nungungulu a nga ganeya, khuye: ‘Wa gu mba diga vathu vangu va hongola nyi na rumeya mabhowa tigoni gwago.’ Mabhowa ma di pomeya litigo latshavbo la Vaegipto — ga sighanyi ni sisiwana. Litigo latshavbo li di tala khu mabhowa. Ganiolu, tigoni ga Goseni, omu va nga ba va khala umo Vaisrayeli, gu diri mwalo mabhowa. Gukhugeya avba nya tungu nya wu 4, mitungu yatshavbo yi nga landreya yi di gu tshanisa Vaegipto basi. Faro a di embeya Mosi khuye: ‘Lomba Jehovha gasi gu a dusa mabhowa yaya. Vathu vanu va na hongola.’ Ganiolu, tepo Jehovha a nga dusa mabhowa, Faro a di vbindrugedza mapimo. Kha dzumeya gambe gu khuye va hongola. Ina Faro a di hadzi tshuka a hevbula gilogyo?

Jehovha a di khuye: ‘Faro a gu mba diga vathu vangu va hongola, sirengo sa Vaegipto si na dwala si bwe sifa.’ Khu mindru wakona, sirengo si di pheya gufa. Ganiolu, sirengo sa Vaisrayeli kha sa nga ba sifa. Ambari ulolo, Faro a di gu simama gu bomba, nigu kha dzumeya gu va diga va hongola.

Khavbovbo, Jehovha a di embeya Mosi gu khuye a hongola ga Faro a ya swaya nguma vbatshani. Nguma wu di vbindrugedza wu khala kudzudzwani wu enedza gwatshavbo wu bwe wu namareya Vaegipto vatshavbo. Nguma wowo wu di vanga sithunya givilini gya Vaegipto vatshavbo gupata ni sirengo sawe. Ambari ulolo, Faro a di gu simama gu bomba gu diga Vaisrayeli va hongola.

Jehovha a di ruma Mosi a bweleya ga Faro a ya mu wudzisa khuye: ‘U nga gu bomba gu diga vathu  vangu va hongola? Mindru nyi na wisa maralala tigoni gwago.’ Khu mindru wakona, Jehovha a di rumeya maralala, mabara, ni gulasa. Gu diri gingulu nyo thise nya gu gima gi di si manegi Egipto. Dzimbewu ni misimbo yatshavbo si di songetedwa. Ganiolu, tigoni ga Goseni gi mwalo gi ngafa. Faro a di khuye: ‘Lomba Jehovha a emisa gingulu gegi, mu na bhi mu hongola.’ Ganiolu, na gi ngari gu ema gingulu, Faro a vbindrugedza mapimo.

Mosi a di vbedza khuye: ‘Misimbo yatshavbo yi nga tshidwa khu ndzadzi nya maralala, yi na hodzwa khu dzighafanyotu.’ Dzi dita dzighafanyotu nya dzingi ngudzu dzi ta hodzeteya satshavbo si nga ba si tshade mathembweni. Faro a di khuye: ‘Lomba Jehovha gasi gu a dusa dzighafanyotu dzedzi.’ Ganiolu hwane nyo ba Jehovha na duside dzighafanyotu, Faro a di simama gu bomba gu diga Vaisrayeli va hongola.

Jehovha a di embeya Mosi khuye: ‘Khusedza libogo lago li khedza ndzadzini.’ Tepo a nga khusedza libogo, ndzadzini gu di sivbala hugo mphu. Vaegipto va di khala matshigu mararu gidemani, na va si woni gilo ne guwonana khu gyawe. Vaisrayeli khavo vonga va nga ba vari guwonegeyani mudzindrangani gwawe.

Faro a di embeya Mosi khuye: ‘Gimbiyani, uwe ni vathu vago. Ganiolu, tshiyani sirengo sanu.’ Mosi huye khuye: ‘Gu vbwetega hi hongola ni sirengo sathu gasi hi ya gira khiso miphaso ga Nungungulu wathu.’ Faro a di goroga ngudzu. A vbenya khuye: ‘Khuga vbafuvbi gwangu! nyo tshuka nyi gu wona gambe mbeli gwangu, nyi na gu songa.’