Tigoni ga Uzi, gu diri ni mwama moyo a nga ba a khozeya Jehovha. Lina laye gu diri Joba. Uye a diri mwama nyo ghanye ngudzu nigu a diri ni ndranga nya yikhongolo. Uye a diri muthu nya wadi nigu a di gu phasa sisiwana, vanyamayi nyo fedwe khu vama, ni sanana nya mba na vavelegi. Ganiolu, ina olu a nga ba a gira silo nya sadi, si di gu thula gu khiso kha na nga tshuka a tshangana ni sigaradzo?

Sathane, Dhiyabhulosi a di gu khala khu gu mu khedziseya. Ganiolu, Joba kha nga ba a siti isoso. Jehovha a di embeya Sathane khuye: ‘U gi wonide githumi gyangu Joba? Mwalo mumbe muthu mafuni a fanago naye. A ngu nyi engisa a bwe a gira silo nya sadi.’ Sathane a di hlamula khuye: ‘Khu lisine, Joba a ngu gu engisa. Anuwe u ngu mu vhikeya ni gu mu kategisa. U mu ningide gipeto ni sirengo. Mu dzegeye satshavbo a gu naso. U na mu wona, a na diga gu gu khozeya.’ Jehovhaa di khuye: ‘Mu linge. Ganiolu, u nga mu songi.’ Khu ginani Jehovha a nga diga Sathane a linga Joba? A di gu dziti gwadi gu khuye Joba kha na nga diga gu mu engisa.

Sathane a di pheya gu linga Joba khu sigaradzo nya singi. Gupheya, a di mu rumeya vathu va ranwago pwani khu Vasabheya gasi va yaba dzimombe ni dziburu dza Joba. Khavbovbo, dzinvuta dzaye dzi vbiswa khu nilo. Gu dita vambe vathu nya Vakalidhiya va taba dzikamelo dzaye. Sithumi saye si nga ba si sayisa sirengo soso, aniso si di songwa. Gu di landreya gigaradzo nya gikhongolo ngudzu. Sanana satshavbo sa Joba si di thegedwa khu paredhi nya nyumba na si gira festa. Joba a di vbisega monyoni, ganiolu kha diga gu khozeya Jehovha.

Sathane a di gu vbweta gu khuye Joba a tshaniseka ngudzu. Khu kharato, a di gira gu givili gyatshavbo gya Joba gi manega ni silondra. Joba a di gupwa guvbisa nya  gukhongolo ngudzu. A di si dziti gu khuye khu ginani si mu dugeleyago silo sesi satshavbo. Ambari ulolo, Joba a di simama gu khozeya Jehovha, nigu Jehovha a si wone satshavbo soso, a bwe a tsakiswa khu Joba.

Khu gu landreya, Sathane a di rumeya vama vararu gasi gu va ya linga Joba. Va di ya mu embeya esi: ‘Gyomo gighoho u nga gira u zamago gu gi siha. Nungungulu o gu tsayisa.’ Joba a di hlamula khuye: ‘Kha nya ghoha gilo.’ Ganiolu, a di pheya gu pimisa gu khuye Jehovha khuye a mu vangeyago sigaradzo soso, a bwe a mu sola khuye esi Nungungulu a nga ba a gira khandri sadi.

Gu diri ni gikhwatana gimwegyo nyo pwani khu Elihu, gi nga ba gi engiseya gwadi mabhulo yawe. Khavbovbo, gi di hakha khigyo: ‘Satshavbo esi mu ganedego khandri lisine. Jehovha khongolo guvbindra esi hi si pwisisago. Gima na sa tshuka a gira silo nya guvivbe. A ngu si wona silo satshavbo si giregago nigu a ngu phasa vathu vaye sigaradzoni sawe.’

Khavbovbo, Jehovha a di ganeya ni Joba, khuye: ‘U diri hayi tepo nyi nga gira ndzadzi ni mafu? Khu ginani u ganeyago gu khuwe esi nyi girago khandri sadi? Wo ganeya basi, ganiolu kha wu dziti gu khuwe khu ginani silo sesi si dugeleyago.’ Joba a di dzumeya gu khuye phazamide, khavbovbo huye khuye: ‘Nyi phazamide. Nyi di gupwa gu pwani u womo, ganiolu olu nyi ngu guti gwadi. Gimwalo u gi tandrago. Nyi divaleye khesi nyi nga ganeya.’

Tepo silingo si nga vbeya, Jehovha a di vbanyisa Joba a bwe a mu ninga silo nya singi nyo vbindre esi a nga ba ari naso. Joba a di vbedza a vbanya khu tepo nyo laphe ngudzu na tsakide. Jehovha kategiside Joba kholu a nga mu engisa ambari ga tepo si nga ba si garadza gu gira isoso. Uwe ke, u na fana ni Joba u simama gu khozeya Jehovha, ambari giemo gyo ba gi garadza?