Egipto, sanana sa Jakobe si di gu ranwa pwani Vaisrayeli. Hwane nyo ba Jakobe ni Josefa na va fude, gu di pheya gu fuma yimbe pfhumu Egipto nyo pwani khu Faro. Faro yoyo a di gu thava gu khuye Vaisrayeli va tala va manega ni tshivba ngudzu guvbindra Vaegito. Khavbovbo, a di pheya gu va tshanisa. A di va gurumedza gu gira dzibhiloko a bwe a va thumisa ngudzu mathembweni. Ganiolu, tepo Vaegipto va nga ba va ya va va tshanisa, Vaisrayeli navo va di gu simama gu tala. Kha nga olu Faro si nga ba si si mu tsakisi isoso, a di ruma gu khuye sanana satshavbo nya sikhwathana sa vaIsrayeli si songwa na si ngari gu velegwa. Vaisrayeli va di thava ngudzu.

Nyamayi nyo khaguri nya Muisrayeli nyo pwani khu Jokebhedhi a di velega gyanana nya gikhwatana nyo mbure ngudzu. Gasi gu gi vhikeya, a di gi theya omu nya rava a ya gi siha omu nya mwasi Tsongoni wa Nilo. Miriyamu, ndriye wa gikhwathana gegi, a di khala vbafuvbi ni rava wowo gasi a wona gu khuye ginani gi nga hadzi dugeleya.

Tepo nyamahegyane wa Faro a nga hongola tsongoni gasi a ya hamba, a di wona rava. Ndrani nya rava wowo, a di mana gyanana na gi liya, a gi  pweya wusiwana. Miriyamu a di mu wudzisa khuye: ‘Nyi ya gu raneya nyamayi nyo khaguri gasi a ta gu mamiseya gyanana gegi?’ Tepo nyamahegyane wa Faro a nga khuye ina, Miriyamu a di ya rana Jokebhedhi, mamayi wa gikhwathana gegi. Gyanana gya Faro gi di mu embeya khigyo: ‘Dzega gyanana gyegi, u nyi mamiseya, nyi na gu livba.’

Tepo gyanana gi nga dandra, Jokebhedhi a di gi vbwegedza ga nyamahegyane wa Faro, a gi riya khuye khigyo Mosi a bwe a gi sayisa nga khatshi gyanana gyaye. Mosi a di dandriswa nga gyanana gya pfhumu nigu a di gu mana satshavbo a nga ba a si vbweta. Ganiolu, Mosi gima kha divala Jehovha. A di gu dziti gu khuye uye Muisrayeli — kha nga ba ari Muegipto, nigu a di hatha gu thumeya Jehovha.

Tepo a nga tshanganisa 40 myaga, Mosi a di hunga gu phasa Vaisrayeli vakwawe. Tepo a nga wona Muegipto nyo khaguri na veta Muisrayeli, Mosi a di veta Muegipto yoyo kala afa. Mosi a di futeya girumbi gyakona mafuni. Tepo Faro a nga si tugula, a di zama gu songa Mosi. Ganiolu Mosi a di tutuma a hongola tigoni ga Medhiyani. Jehovha a di simama gu mu sayisa ambari tepo nga ba ari iyoyo.