Mosi khade 40 myaga Midhiyani. A dzega nyamayi a bwe a velega naye sanana. Litshigu limwedo na gu havisa tshambi waye vbafuvbi ni Gigomo gya Sinayi, a di wona gilo nyo hlamadzise. A di wona simbo na wu khondra nilo, ganiolu na wu sivbyi! Tepo Mosi a nga hidzimeya vbafuvbi gasi a ya wona gu khuye ginani, a dipwa lito na li gu duga khavbo nya simbo wowo khilo: ‘Mosi! U nga hidzimeyi vbafuvbi. Tshula dzisandaliya dzago, kholu wulanga u emidego avbo wu agide.’ Khu Jehovha a nga ba a ganeya khu gu thumisa ngilozi.

Mosi a di thava, a dzi fenengedza khovbe. Lito li di khilo: ‘Nyi ngu gu wona gutshaniseka ga Vaisrayeli. Nyi na va tshudzisa ga Vaegipto nyi bwe nyi va ninga litigo nya ladi. Uwe khuwe u na thangeyago vathu vangu va duga Egipto.’ Isoso si mu hlamadziside ngudzu Mosi, khandridzo?

Mosi a di wudzisa khuye: ‘Vo nyi wudzisa gu khavo khu mani a nga nyi ruma, nyi na kheni ginani?’ Nungungulu a di hlamula khuye: ‘Va embeye khuwe Jehovha, Nungungulu wa Abrahama, Nungungulu wa Isaki, ni Nungungulu wa Jakobe khuye a nga nyi ruma.’ Mosi a di wudzisa gambe khuye: ‘Ahati va gu mba nyi engisa ke?’ Jehovha a di tiyisegisa Mosi gu khuye a na mu phasa. A di mu ruma gu rinya ndronga yaye mafuni. Khavbovbo, ndronga yi di vbindrugedza yi khala nyoga! Tepo Mosi a nga mola nyoga khu ngiya, yi di vbindrugedza yi khala gambe ndronga. Jehovha a di khuye: ‘Wa gu gira gilewugiso gegi na va gu wona, va na khodwa gu khavo kheni nyi nga gu ruma.’

Mosi a di khuye: ‘Kha nyi kodzi gu ganeya gwadi.’ Jehovha a di mu tumbisa khuye: ‘Nyi na gu embeya esi u na ganeyago, nigu u na hongola ni ndriyago Aroni gasi a ya gu phasa.’ Tepo Mosi a ngati gu khuye Jehovha na ni uye, a di dzega mwangadzi waye ni sanana saye va bweleya Egipto.