Vaisrayeli va di khuga Gigomoni gya Sinayi va gimbiya khu giwulani gya Parani kala va vboha ga wulanga wu ranwani pwani Kadesi. Na vari iyoyo, Jehovha a di ya embeya Mosi khuye: ‘Rumeya 12 vama, dusa moyo ga lihundzu limwedo ni limwedo, u va ruma va ya wona litigo la Khanani.’ Khu kharato Mosi a di hatha 12 vama a bwe a va embeya khuye: ‘Gimbiyani Khanani, mu ya wona gu khenu litigo leli li ngu fuma guhodza mwendro ne. Mu bwe mu wona gu khenu vathu vakona va ni tshivba mwendro ne, nigu va gu vbanya omu nya matendra mwendro madhoropani.’ Dzixpiyawu dzodzo, gupata ni Josuwa ni Kalebi, va di hongola Khanani.

Hwane nya 40 matshigu, dzixpiyawu dzodzo dzi di bweleya ni minguyu, maroma, ni dziuvha. Dzi di ya ganeya khidzo: ‘Litigo khyadi. Ganiolu, vathu vakona va na ni tshivba nigu madhoropa yakona ma na ni dziparedhi nyo laphe.’ Kalebhi a di khuye: ‘Hi na va pala. Hongoleni olu kamo!’ U ngu dziti gu khuwe khu ginani Kalebhi a nga ba a ganeya isoso? Khu gu uye ni Josuwa va di gu tumba Jehovha. Ganiolu, edzi dzimbe dzixpiyawu nya 10 dzi di khidzo: ‘Ahihi! Vathu vakona va laphide, va ngu fana ni ava va nga velegwa khu vanyamayi ni dzingilozi! Ha gu ema navo, ho gira nga khatshi hi dzighafanyotu.’

Vaisrayeli va di vbeya tshivba. Va di pheya gu ngurangura va hunga gikungo, khavo: ‘Hi nga hongolini ga litigo lile kholu hi ngafa.’ Josuwa ni  Kalebhi havo khavo: ‘Mu nga digi gu engisa Jehovha, nigu mu nga thavi. Jehovha a na hi vhikeya.’ Ganiolu, vaIsrayeli kha va engisa. Va di bwe va vbweta ni gu songa Josuwa ni Kalebhi!

Ginani a giridego Jehovha? A di embeya Mosi khuye: ‘Vaisrayeli nyi va girede silo nya singi ngudzu. Ambari ulolo, va nga gu simama gu mba nyi engisa. Khu kharato, va na khala 40 myaga giwulani va bwe va feya umo. Ganiolu, sanana sawe Josuwa ni Kalebhi khavo va na vhanyago omu nya litigo nyi va tumbisidego.’