Vaisrayeli va khade giwulani khu gipimo nya 40 myaga. Va di pade madhoropa nya mangi ngudzu. Khu tepo yoyo, va di ghwimbide matendra yawe vbafuvbi ni mitsongo ya Mowabhi khu khuga-dambo nya Tsongo wa Joridhani. Yi di gu vboha tepo nya gu va beya Tigoni nya Gitumbiso. Bhalaki, pfhumu ya Mowabhi, a di gu thava gu dzegedwa litigo laye khu Vaisrayeli. Khu kharato, a di ranisa mwama moyo nyo pwani khu Bhalahama gasi aya valeteya Vaisrayeli.

Ganiolu, Jehovha a di embeya Bhalahama khuye: ‘U nga valeteyi Vaisrayeli.’ Khu kharato, Bhalahama a di bomba gu hongola Mowabhi. Pfhumu Bhalaki a di mu ranisa khu tepo nya wuvili a bwe a mu tumbisa gu mu ninga ni gevbini a na gi vbwetago. Ambari ulolo, Bhalahama kha dzumeya gambe. Nungungulu a di vbedza a mu embeya gu khuye: ‘Gimbiya. Ganiolu, gimbiya u ya ganeya esi nyi na gu embeyago.’

Bhalahama a di khileya buru yaye a hongola Mowabhi. A di vbweta gu ya valeteya Vaisrayeli, ambari olu Jehovha a nga ba a mu embede gu khuye a nga va valeteyi. Tepo a nga ba a hongola, gu di wonega ngilozi ya Jehovha dzitepo dziraru ndziyani. Buru ya Bhalahama yi di gu yi wona ngilozi yeyi, ganiolu Bhalahama kha nga ba a yi wona. Tepo nyo pheye, buru yi di ndreya yi beya mathembweni. Tepo nya wuvili, yi di ya dzi manya avba nya muru nya siwindri, Bhalahama a manywa litundru. Khu guhegisa, buru yi di khala vbakari nya ndziya. Ga dzitepo dzedzi dza dziraru, Bhalahama a di gu veta buru yaye khu ndronga.

Ga tepo nya wuraru, Jehovha a di gira gu buru yi ganeya. Buru yi di wudzisa Bhalahama khiyo: ‘Khu ginani u nyi veteleyago?’ Bhalahama a di hlamula khuye: ‘U di nyi gira khatshi dzo mba khota. Nari khatshi nyi diri ni xipadha, na nyi gu songide.’ Buru yi di mu hlamula khiyo: ‘Gu ngu vbindra myaga nya yingi nu nyi khileya. Nyi di nga tshuka nyi gu gira esi?’

Khavbovbo, Jehovha a di gira gu Bhalahama a yi wona ngilozi. Ngilozi yi di khiyo: ‘Jehovha a gu embede gu khuye u nga hongoli u ya valeteya Vaisrayeli.’ Bhalahama a di khuye: ‘Nyi phazamide. Nyi ngo bweleya gaya.’  Ganiolu, ngilozi yi di mu embeya gu khiyo: ‘Gimbiya Mowabhi. Ganiolu, u ya ganeya basi esi Jehovha a nga gu embeya.’

Ina Bhalahama hevbude gilogyo? Ahihi. Hwane nyo ba a vbohide, Bhalahama a di zama gu valeteya Vaisrayeli dzitepo dziraru. Ganiolu, ga dzitepo dzodzo dzatshavbo, Jehovha a di gira gu a va kategisa. Khu guhegisa, Vaisrayeli va di dhumeya litigo la Mowabhi, Bhalahama a songwa. Ina na sa sa khala tshukwana gu Bhalahama na dzegede gu engisa Jehovha?