Jehovha a di embeya Mosi khuye: ‘Lita uta eno gigomoni. Nyo vbweta gu lova milayo yangu avba nya siwindri nyi gu ninga.’ Mosi a di gweya gigomoni a ya khala 40 matshigu ni 40 wutshigu. Tepo a nga ba ari iyoyo, Jehovha a di lova milayo nya lisima avba nya siwindri a ninga Mosi. Milayo yoyo yi di gu ranwa pwani Milayo nya Likhume.

Hwane nya tepo nyo khaguri, Vaisrayeli va di pimisa gu khavo Mosi a di tshade enga. Va di embeya Aroni khavo: ‘Ho vbweta muthu gasi gu a hi thangeya. Hi gireye nungungulu!’ Aroni a di khuye: ‘Nyi ningeni ouro yanu.’ A di nyegisa ouro yoyo a gira gifananiso nya gimombyana. Vathu va di khavo: ‘Gimombyana gegi khuye Nungungulu wathu a nga hi dusa Egipto!’ Va di pheya gu khozeya gimombyana gyogyo nya ouro, va bwe va gira festa. Ina isoso si diri silo nya sadi? Ahihi. Kholu vathu va di gu tumbiside gu khozeya Jehovha basi. Ganiolu, avo va di diga gu gira esi va nga tumbisa.

Jehovha a di wona esi si nga ba si girega, khavbovbo a embeya Mosi khuye: ‘Tshiga u va yela. Va digide gu nyi engisa.  Vo khozeya nungungulu nya malipha.’ Mosi a di tshiga khu gigomoni, na pharide siwindri sivili.

Tepo Mosi a nga ba a vboha vbafuvbi nya matendra, a dipwa vathu na va gu embeleya. Khavbovbo, a di va wona na va gu haneya ni gu khidzimeya gimombyana. Mosi a di goroga ngudzu. A di digeledza siwindri sile sa sivili a nga ba a pharide si thega si pandrega. A dzegeya gu khungumuleya gifananiso gile. Khavbobvo a wudzisa Aroni khuye: ‘Va gu kodzide kharini gu gu kutsedzeya gu gira silo sesi nyo vivbe ngudzu?’ Aroni a di khuye: ‘U nga gorogi. U ngu vati nuwe vathu vava. Va di gu vbweta nungungulu, khu kharato nyi di nyegisa ouro yawe niloni gu duga gimombyana gegi!’ Aroni kha nga ba a yede gu gira isoso. Mosi a di bweleya gigomoni a ya lomba Jehovha gasi a va divaleya.

Jehovha a di divaleya vale va nga ba va dzi emisede gu mu engisa. U ngu li wona lisima nya gu engise Jehovha ni ava a va thumisago gasi gu thangeya?