Hwane nya gu ba yi vbindride migima mivili Vaisrayeli na va dugide Egipto, va di vboha Gigomoni gya Sinayi, va ghwimba matendra yawe va hefemula avbo. Jehovha a di rana Mosi vbatshani nya gigomo a ya mu embeya khuye: ‘Nyi tshudziside Vaisrayeli. Va gu nyi engisa va bwe va sayisa milayo yangu, va na khala vathu vangu nyo hathege.’ Mosi a di tshiga khu gigomoni a ya embeya Vaisrayeli esi Jehovha a nga ba a ganede. Va di khavo ginani? Va di hlamula khavo: ‘Hi na gira satshavbo esi Jehovha a nga ganeya.’

Mosi a di bweleya gambe gigomoni. Khavbovbo, Jehovha a di ya mu embeya khuye: ‘Ndrani nya matshigu mararu, nyi na ganeya nanu. Embeya Vaisrayeli va si phazami va gweya eno Gigomoni gya Sinayi.’ Mosi a di tshiga a ya embeya Vaisrayeli gasi gu va dzi dongiseya gu engiseya Jehovha.

Khu litshigu nya wuraru, Vaisrayeli va di wona gulasa ni lipfhi nyo sivbale vbatshani nya gigomo. Va dipwa gambe gudzuma nya gukhongolo nya libara ni pundru. Khavbovbo, Jehovha a di tshiga khu nilo a hongola vbatshani nya gigomo. Vaisrayeli va di thava ngudzu nyo bwe va ndrendremeya. Gigomo gyatshavbo gi di hana-hana ngudzu nyo bwe gu tuviga wutshi wu gi fenengedza. Ligwaha nya pundru li diya li engedzeya ngudzu. Khavbovbo, Nungungulu a di khuye: ‘Kheni Jehovha. Mu nga khozeyi vambe vanungungulu.’

Mosi a di bweleya gambe gigomoni. Jehovha a di ya mu ninga milayo nya edzi va nga ba va yede gu mu khozeya khidzo ni edzi va nga ba va yede gu vbanya khidzo. Mosi a di lova milayo yoyo, khavbovbo a ya lereya Vaisrayeli. Avo va di tumbisa khavo: ‘Hi na gira satshavbo esi Jehovha a nga ganeya.’ Va di tumbisa Nungungulu gu khavo va na mu engisa. Ina va mu engiside?