Tepo Mosi a nga ba ari Gigomoni gya Sinayi, Jehovha a di mu ruma gu vbhaha litendra nyo hathege ngudzu. Litendra lolo li di gu ranwa pwani tabhernakeli. Khumo Vaisrayeli va nga ba va yede gu khozeya umo Jehovha. Tabhernakeli yeyi va di gu gimbiya-gimbiya nayo omu va nga ba va hongola umo.

Jehovha a di khuye: ‘Embeya vathu va dusa esi va si kodzago gasi gu phasedzeya guvbahwa nya tabhernakeli.’ Vaisrayeli va di dusa ouro, prata, cobre, siwindri nya lisima ni dziphera nyo dhure. Va di ningeya gambe mawoya nya dzinvuta, sombo nyo mbure, ni simbe silo nya singi. Va di ningeya silo nya singi avba nya gu Mosi a ganeya gu khuye: ‘Mu nga resi gambe simbe! Si enede.’

Vama ni vanyamayi nya vangi va nga ba vari ni wugengeyi va di phasedzeya gu vbaha tabhernakeli. Jehovha a di va ninga wugengeyi gasi va gira thumo wowo. Vambe va di gu thumisana ni dzikhindra, va luga tshalu nya gu ambagise ni gu mburiseya tabernakeli. Vambe va di gu vegedzeya siwindri, va thuma ni ndralama, mwendro gu pola madhera.

Vathu va di vbaha tabhernakeli, va di vbaha edzi Jehovha a nga ba a va leletede khidzo. Va di gira kortina nyo mbure nya gu bhiye khiyo gasi gu tabherinakeli yi manega ni malanga mavili. Wulanga wumowo wu di gu ranwa pwani wulanga nya Guage, owu wumbe wu di gu ranwa pwani wulanga nya Guage-ngudzu. Omu nya wulanga nya Guage-ngudzu gu diri ni arka nya pwanano, yi nga ba yi giridwe khu simbo nya acácia ni ouro. Omu nya wulanga nya Guage gu diri ni meza nya dzikandriya yi nga ba yi giridwe khu ouro, ni altari nya gu vbiseye avbo libani. Vbavbandze nya tabhernakeli, gu diri  ni basiya nya bronze ni altari nya yikhongolo. Arka nya pwanano yi di gu dundrugisa Vaisrayeli gitumbiso va giridego nya gu engise Jehovha. U ngu dziti gu khuwe ginani pwanano? Gitumbiso nyo khaguri nya guhathege.

Jehovha a di hatha Aroni ni sanana saye gasi va thuma omu nya tabharnakeli kha nga vapristi. Va di yede gu yi sayisa ni gu gireya umo miningelo yawe ga Jehovha. Khu Aroni basi a nga ba a dzumeledwa gu beya wulangani nya Guage-ngudzu kholu khuye a nga ba ari mupristi nya khongolo. A di gu beya gumogo khu mwaga, gasi gu ningeya muphaso nya sighoho saye, sa ndrangani gwaye, ni esi sa Vaisrayeli vatshavbo.

Vaisrayeli va vbedzide gu vbaha tabharnakeli hwane nya gu ba gu vbindride mwaga moyo na va dugide khu Egipto. Olu va diri ni wulanga nya gu khozeye umo Jehovha.

Jehovha a di yeyedza gu khuye a yi tsakede tabhernakeli khu gu yi tadza khu wudhumo waye, nigu gu di gu wonega lipfhi khu vbatshani gwayo. Tepo lipfhi li nga ba liri vbatshani nya tabharnakeli, Vaisrayeli va di simama gu khala avbo va nga ba va romo. Ganiolu, tepo lipfhi li nga khugega, va di gu dziti khavo yi diri tepo nya gu va hongola. Va di yede gu rwala tabhernakeli va landriseya lipfhi.