Vaisrayeli va di diga gambe gu khozeya Jehovha va khozeya vanungungulu nya malipha. Tepo Vaamoni va nga wugeya Vaisrayeli, vanungungulu vovo nya malipha gimwalo va gi kodzidego gu gira gasi gu vhikeya Vaisrayeli. Vaisrayeli va di tshaniseka khu myaga nya yingi. Khu guhegisa, va di embeya Jehovha gu khavo: ‘Hi ghohide. Ho lomba gu khethu u hi vbulugisa ga valala vathu.’ Vaisrayeli va di tshungunuleya sifananiso satshavbo va bwe va pheledza gu khozeya Jehovha. Jehovha kha nga ba a vbweta gu va wona na va tshaniseka.

Gu di hathwa lisotshwa limwedo nya tshivba nyo pwani khu Jafeti gasi a thangeya vathu va ya dwana ni Vaamoni. Jafeti a di embeya Jehovha khuye: ‘Wo hi phasa gu pala nyimbi yeyi, nyi ngu gu tumbisa gu kheni oyu a na pheyago khuye a nyi khinga tepo nyi na wuyago, nyi  na gu ninga uye yoyo kamo.’ Jehovha a dipwa nombelo wa Jafeti a bwe mu phasa gu pala nyimbi yoyo.

Tepo Jafeti a nga bweleya gaya, muthu nyo pheye a nga duga a mu khinga gyanana gyaye nya gyagadzyana, gyagimwegyo a nga ba ari nagyo. A di duga na womba gingomana ni gu hana. Ginani egi Jafeti a nga hadzi gira? A di dundruga gitumbiso gyaye, khuye: ‘O mwanangu, u nyi homode monyo. Nyi tumbiside Jehovha. Gasi nyi gira esi nyi nga mu tumbisa, gu vbwetega nyi gu rumeya tabhernakelini eyi Silo u ya khala ni gu tumeya iyo.’ Nyamahegyane waye a di khuye: ‘Papayi, wo ba u tumbiside Jehovha, gira esi u nga mu tumbisa. Nyo lomba gilo gimwegyo basi. Nyo lomba gu kheni u nyi diga nyi hongola sigomoni nyi ya khala iyo khu migima mivili basi ni dzipari dzangu nya sagadziyana, nyi na vbedza nyi hongola.’ Nyamahegyane wa Jafeti a di vbedza a ya thuma omu nya tabherinakeli khu gutumbege womi waye watshavbo. Mwaga ni mwaga, dzipari dzaye dzi di gu hongola dzi ya mu wuseya.