Mwama moyo nya Muisrayeli nyo pwani khu Elikana a diri ni vanyamayi vavili, moyo wakone a diri Ana, oyu mumbe gu diri Penina. Ganiolu, Elikana a di gu haladza ngudzu Ana. Olu Penina a nga ba ari ni sanana nya singi, a di gu khaleya gu hega Ana kholu a nga ba ari mwalo gyanana. Mwaga ni mwaga, Elikana a di gu dzega ndranga yaye va hongola Silo gasi va ya khozeya. Litshigu limwedo, na vari Silo, Elikana a di wona gu khuye mwangadzi waye a nga ba a mu haladza ngudzu a di gorogide ngudzu. A di mu embeya gu khuye: ‘Ana, ngadzangu, u nga liyi. Eni nyi mwama wago, nyi ngu gu haladza ngudzu.’

Ana a di vbedza a ya gombeya. Tepo a nga lomba gu khuye Jehovha a mu phasa, a di si kodzi ni gu ema gu liya. Ana a di tumbisa Jehovha khuye: Wo nyi ninga gyanana nya gikhwathana, nyi na gi ningeya gwago, gasi gi gu thumeya womini wagyo watshavbo.’

Eli, mupristi nya khongolo, a di wona Ana na gu liya ni gu ndzikwila a pimisa gu khuye a di leva. Ana a di mu embeya gu khuye: ‘Ahihi, pfhumu yangu, kha nya leva. Nyo va ni gigaradzo nya gikhongolo ngudzu. Nyo ganeya ni Jehovha khigyo gigaradzo gegi.’ Eli a di tugula gu khuye a di gu phazama, khavbovbo khuye: ‘Nungungulu a na gu ninge esi u lombago.’ Tepo Ana a nga vbedza gu gombeya, a di pepa monyoni a khuga a  hongola. Hwane nya gu ba gu vbindride gitepwana, Ana a di velega gyanana nya gikhwathana a gi riya lina nyo pwani khigyo Samuweli. Ana tsakide ngudzu, khandridzo?

Ana kha divala esi a nga tumbisa Jehovha. Tepo gyanana gi nga diga gu mama, a di hongola nagyo umo nya tabhernakeli gasi gi ya thumeya iyo. A di embeya Eli khuye: ‘Egi khigyo gyanana nyi nga ba nyi lomba ga Jehovha. Olu nyi ngu mu ningeya ga Jehovha matshiguni yatshavbo nya guvbanye gwaye.’ Mwaga ni mwaga, Elikana ni Ana va di gu wuseya Samuweli va bwe va mu yela ni gibhadzyana nya giphya. Khu gu phaswa khu Jehovha, Ana a di vbedza a velega sikhwathana sivili ni sagadzyana sivili.