Khu gu gimbiya nya tepo, Vaisrayeli va di bwe va diga gu khozeya Jehovha va pheya gu khozeya vanungungulu nya malipha. Khu gipimo nya 7 myaga, Vamedhiyani va di guba sifuyo sa Vaisrayeli va bwe va ghoheteya mathembwe yawe. Gasi va si songwi khu Vamedhiyani, Vaisrayeli va di gu sihala omu nya mavbala ni sigomoni. Va di pheya gu lomba Jehovha gu khavo a va vbulugisa. Jehovha a di rumeya ngilozi ga lidzaha nyo pwani khu Gidheyoni, yi ya khiyo: ‘Jehovha a gu hathide gasi u khala lisotshwa nya tshivba ngudzu.’ Gidhiyoni a di yi wudzisa khuye: ‘Nyi na va vbulugisa kharini Vaisrayeli? Kha nyiri wa gilo olu u nyi wonago!’

Gidhiyoni a di hadzi dziti kharini gu khuye Jehovha hathide uye? A di vega tshalu vbavbandze a embeya Jehovha gu khuye: ‘Go kala gugya tshalu yeyi na yi naganide khu thondrwane, ganiolu mafu na ma bangide, nyi na dziti gu kheni u nyi hathide gasi gu ya vbulugisa Vaisrayeli.’ Ni dzimindru dzakona, tshalu yi di naganide, mafu ma di bangide! Ganiolu, Gidhiyoni a di lomba gu khuye ni dzimindru dzi nga landreya, a mana tshalu na yi bangide, ma nagana mafu. Tepo si nga girega isoso, Gidhiyoni a di dzegeya gu khodwa gu khuye Jehovha a di hathide uye. A di tshanganisa masotshwa yaye gasi a ya dwana ni Vamedhiyani.

 Jehovha a di embeya Gidhiyoni gu khuye: ‘Nyi na phasa Vaisrayeli gu pala. Ganiolu, kha nga olu masotshwa yago ma gu vangi ngudzu, mu nga tshuka mu pimisa gu khenu mu di pala khu tshivba yanu. Khu kharato, embeya ava va thavago, va bweleya. Gu di bweleya 22 000 vama, gu tshala 10 000 nya avo. Jehovha a di khuye: ‘Vama vovo vangi. Gimbiya navo gitsongwanatunu u ya va ruma va seya mati. Oyu a na seyago mati na gu khedziseya valala gasi a dzi woneya, a na tshale.’ Gu di tshala 300 vama basi, a gu ava va nga seya mati na va dzi woneya. Jehovha a di tumbisa gu khuye vama vovo nya vadugwana va di hadzi pala 135 000 masotshwa nya Vamedhiyani.

Ni wutshigu wakone, Jehovha a di embeya Gidhiyoni khuye: ‘Yi vbohide tepo nya gu u ya dwana ni Vamedhiyani!’ Gidhiyoni a di dzega mipundru ni dzikhali dzi nga ba dziri ni nilo a ninga masotshwa yaye. A ma embeya gu khuye: ‘Nyi khedziseyeni, mu vbedza mu gira esi nyi na girago.’ Gidhiyoni a di womba pundru, a pandra khali, a khusedza nilo, a ganeya esi khu lito nyo khugege: ‘Xipadha khya Jehovha ni Gidhiyoni!’ Vatshavbo vama vale nya 300 anavo va di gira sasimweso. Vamedhiyani va di thava ngudzu va phalalegeya malangani yatshavbo. Va di pheya gu songana khu gu thava. Ga tepo yeyi gambe, Jehovha phaside Vaisrayeli gu pala valala vawe.