Vambe vathu va tigoni ga Khanani va di gu siti esi si nga dugeleya dhoropani ga Jeriko. Dzipfhumu nya mambe madhoropa ya Khanani dzi di wona nari tshukwana gu patana gasi dzi ya dwana ni Vaisrayeli. Ganiolu, Vagibhiyoni va di dundrugeya gu gira simbe silo nyo hambane. Va di ambala sombo nyo hagale, va hongola ga Josuwa va ya khavo: ‘Ha guta khu tigoni ga hwindzo. Hi pwide na gu ganedwa khu Jehovha ni satshavbo esi a mi giredego Egipto ni Mowabhi. Wo tumbisa gu khuwe khu na nga hi wugeya, hi ngu dzumeya gu khala sithumi sago.’

Josuwa a di khodwa esi va nga ganeya, khavbovbo a dzumeya gu khuye kha na nga va wugeya. Hwane nya matshigu mararu, a di tugula gu khuye kha va nga ba vata khu tigoni ga hwindzo. Va diri va tigoni mule ga Khanani. Josuwa a di wudzisa Vagibhiyoni gu khuye: ‘Khu ginani mu nga hi lipheya?’ Va di hlamula khavo: ‘Hi di thava! Hi ngu dziti gu khethu Jehovha Nungungulu wanu a ngu mi dwaneya. Ho lomba gu khethu mu si hi songi.’ Josuwa a di gira esi a nga ba a tumbiside.

Na gu si vbindri tepo nyo laphe, Vagibhiyoni va di tugula gu khavo 5 dzipfhumu dza Vakhanani dzi di hadzi va dhumeya. Vagibhiyoni va di  pheya gu thava. Josuwa ni masotshwa yaye va di gimbiya wutshigu watshavbo gasi va va dwaneya. Vakhanani va di pheya gu tutuma va phalalegeya. Gwatshavbo omu va nga ba va tutumeya umo, Jehovha a di gu thesa maralala nya makhongolo khu vbatshani. Josuwa a di lomba Jehovha gu khuye a emisa lidambo. Khu ginani a nga lomba Jehovha gu khuye a gira isoso narigu lidambo li di si tshuki li ema? Khu gu, Josuwa a di gu mu tumba Jehovha. Lidambo li di ema kamo li si pfoli kala Vaisrayeli va pala dzipfhumu nya Vakhanani ni masotshwa yadzo.