Tepo Mosi a nga ba ari vbafuvbi ni gufa, hwane nyo ba a va thangede khu myaga nya yingi, Jehovha a di mu embeya gu khuye: ‘Khandruwe u na bedzago Vaisrayeli Tigoni nya Gitumbiso. Ganiolu nyi na gu diga u li wona.’ Mosi a di lomba Jehovha gu khuye a lomba mumbe muthu gasi a thangeya Vaisrayeli. Jehovha a di khuye: ‘Gimbiya ga Josuwa, u ya mu embeya gu khuwe khuye a na thangeyago vathu.’

Mosi a di embeya Vaisrayeli gu khuye a di hadzi gufa nya mba hweya nigu Jehovha hathide Josuwa gasi a va thangeya va beya Tigoni nya Gitumbiso. Mosi a di vbedza a embeya Josuwa gu khuye: ‘U nga thavi. Jehovha a na gu phasa.’ Hwane nya gu ba yi vbindride tepo nyo khaguri, Mosi a di lita Gigomoni gya Nebho, khavbovbo Jehovha a di ya mu yeyedza litigo eli a nga ba a tumbiside Abrahama, Isaki, ni Jakobe. Mosi a diri ni 120 myaga tepo a ngafa.

Jehovha a di embeya Josuwa khuye: ‘Tshatuga Tsongo wa Joridhani, u hongola Khanani. Nyi na gu phasa kha nga edzi nyi nga phasa khidzo Mosi. Hevbula nayo wangu tshigu ni tshigu. U nga thavi. Tiya hwambo. Gimbiya u ya gira esi nyi gu rumago.’

Josuwa a di rumeya dzixpiyawu dzimbili dzi hongola dhoropani ga Jeriko. Ga matimo ma landreyago, hi na  hevbula simbe silo maningano ni esi si nga dugeleya iyoyo. Hwane nyo ba dzi wide, va di ta ganeya gu khavo yi diri tepo nya yadi nya gu va hongola Khanani. Khu litshigu li nga landreya, Josuwa a di embeya vathu gu khuye va peteleya matendra yawe. Khu gulandreya, a embeya vapristi va nga rwala arka nya pwanano gu khuye va yi dzega va thanga nayo va hongola Tsongoni wa Joridhani. Tsongo wu di tade khu mati. Ganiolu, tepo mawundru nya vapristi ma nga khuha mati, mati nya tsongo ma di ema gu gimbiya khavbovbo mavbwa! Vapristi va di hongola va ya ema vbakari nya tsongo kala Vaisrayeli vatshavbo va tshatuga. Khu mawonelo yago, gilewugiso gegi gi va dundrugiside esi Jehovha a nga ba a va girede Yiphwani nya Gufuviye mwendro ne?

Khu guhegisa, hwane nya myaga yile yatshavbo, Vaisrayeli va vbohide Tigoni nya Gitumbiso. Khavbo va nga vbaha dzindranga dzawe ni madhoropa. Va di lima va yala misimbo nya miuvha ni yimbe misimbo nyo velege mihandru. Tigoni nya Gitumbiso gu diri ni silo nya singi nya sadi nyo hodze ni gu seya. Khu gighelo gyogyo, gu di gu ranwa pwani litigo nya leti ni wulombe.