Eli, Mupristi nya Khongolo a diri ni madzaha mavili ma nga ba ma thuma omu nya tabherinakeli kha nga vapristi. Malina yawe gu diri Hofini ni Finiyasi. Madzaha yaya kha ma nga ba ma engisa milayo ya Jehovha. Tepo Vaisrayeli va nga ba va hongola ni sifuyo va ya gira miphaso ga Jehovha, Hofini ni Finiyasi va di gu hatheya nyama nya yadi va hodza. Eli a di gu siti esi si nga ba si girwa khu sanana saye, ganiolu gimwalo a nga gira. Ina Jehovha a di hadzi va diga va simama gu gira isoso?

Ambari olu Samuweli a nga ba a ngari gyanana ngudzu ga Hofini ni Finiyasi, kha va pimedzeya. Jehovha a di tsaka khu Samuweli. Ga wutshigu nyo khaguri Samuweli na lade, a dipwa lito na li mu rana. A di wuga a tutuma a hongola ga Eli a ya khuye: ‘Kheni oyu, nyi vbohide!’ Eli khuye: ‘Kha nya gu rana. Bweleya u ya lala.’ Samuweli a di bweleya a ya lala. Si di bwe si pheledza gambe. Tepo Samuweli a ngapwa lito lolo khu tepo nya wuraru, Eli a di tugula gu khuye khu Jehovha a nga ba a rana Samuweli. Eli a di embeya Samuweli khuye la gu mu rana gambe lito lolo, a na ganeye khuye: ‘Ganeya Jehovha, kholu githumi gyago gi ngu gupwa.’

Samuweli a di bweleya a ya lala, ganiolu lito lile li di pwala gambe khilo: ‘Samuweli! Samuweli!’ Uye khuye: ‘Ganeya Jehovha, kholu githumi gyago gi ngu gupwa.’ Jehovha khuye: ‘Embeya Eli gu khuwe nyo vbweta gu mu tsayisa uye ni ndranga yaye. A ngu dziti gu khuye madzaha yaye ma  ngu gira silo nyo vivbe omu nya tabhernakeli yangu, ganiolu a gu ma diga — a si ma giri gilo.’ Ni dzimindru dzakona, Samuweli a di tula malimba nya tabhernakeli kha nga edzi a nga ba a tala gu gira khu matshigu. A di gu thava gu embeya Eli Mupristi nya Khongolo esi Jehovha a nga ba a ganede. Ganiolu, Eli a di mu rana a mu wudzisa khuye: ‘Mwanangu, ginani a nga ganeya Jehovha? Nyi embeye satshavbo.’ Khavbovbo, Samuweli a di mu embedzeya satshavbo.

Tepo Samuweli a nga ba aya a dandra, Jehovha a di simama gu mu phasa. Tigoni gwatshavbo, Vaisrayeli va di gu dziti gu khavo Jehovha a di hathide Samuweli gasi a khala muprofeti ni mulamuli.