Tepo dzixpiyawu dzi nga ya wona lidhoropa la Jeriko, dzi di ya khala nyumbani ga nyamayi nyo pwani khu Rahabhi. Pfhumu ya Jeriko yi di si tugula, khavbovbo yi di rumeya masotshwa ma hongola gaya ga Rahabhi. Rahabhi a di siha dzixpiyawu dzodzo dza dzimbili vbatshani nya nyumba, khavbovbo a embeya masotshwa gu khuye ma ya dzi vbwetedzeya wumbe wulanga. A di embeya dzixpiyawu khuye: ‘Nyi na mu phasa kholu nyi ngu dziti gu kheni Jehovha na ni enu nigu mu na pala litigo leli. Nyo lomba gu kheni mu nyi tumbisa gu khenu mu na nyi vbulugisa eni ni valongo vangu.’

Dzixpiyawu dzi di embeya Rahabhi gu khidzo: ‘Hi ngu gu tumbisa gu khethu, ava va na gu ba va romo nyumbani gwago kha va na nga bayiswa.’ Dzi di bwe khidzo: ‘Hunga ngodzi nyo fuviye avba nya janela yago, wo gira isoso, valongo vago kha va na nga songwa.’

Rahabhe a di tshisa dzixpiyawu khu ngodzi khavbo nya janela yaye. Dzixpiyawu dzi di hongola sigomoni dzi ya sihala khu matshigu mararu na dzi si gu bweleyi ga Josuwa. Khavbovbo, Vaisrayeli va di tshatuga Tsongo wa Joridhani, va dzi dongiseya gu dzega litigo la Jeriko. Jeriko khilo lidhoropa nyo pheye va nga li pala. Jehovha a di va ruma gu dzuwulugeya  lidhoropa gumogo khu litshigu ndrani nya 6 matshigu. Khu litshigu nya wu 7, va li dzuwulugede khu 7 dzitepo. Khavbovbo, vapristi va di womba mipundru, masotshwa ma di gira ligwaha nya likhongolo khavba ma nga si kodza khavbo. Dziparedhi nya lidhoropa dzi di khungumuga dzi thega vbavbatshi! Ganiolu, nyumba ya Rahabhi kha ya thega, ambari olu yi nga ba yiri vbafuvbi ni paredhi yi nga khungumuga. Rahabhi ni valongo vaye va di vbulugiswa kholu uye a di gu tumba Jehovha.