Khu tepo nyo khaguri, gu diri ni ndzala Israyeli. Nyamayi nyo khaguri nyo pwani khu Nowemi a di rura a hongola Mowabhi. Hongode ni mwama waye ni sanana saye nya sikhwatana. Khu gu gimbiya nya tepo, mwama wa Nowemi a difa. Sanana saye si di dzega vanyamayi nya Vamowabhi, Rute ni Orpa. Egi gi si tsakisigo khu gu sanana saye niso si difa.

Tepo Nowemi a ngapwa gu pwani ndzala yi di vbede Israyeli, a di wona nari tshukwana gu bweleya gaya. Rute ni Orpa va di pheya gu hongola naye. Ganiolu, na va ngari ndziyani, Nowemi a di va embeya gu khuye: ‘Enu mu sayiside gwadi sanana sangu mu bwe mu nyi sayisa gwadi neni. Nyo vbweta gu kheni mu bwe mu dzegwa gambe. Khu kharato, bweleyani Mowabhi.’ Vanyamayi vovo va di khavo: ‘Ethu hi ngu gu gola! Kha hi vbweti gu hongola hi gu tshiya.’ Nowemi a di simama gu va gurumedza gu bweleya: Khu guhegisa, Orpa a di bweleya, ganiolu Rute kha bweleya. Nowemi a di embeya Rute gu khuye: ‘Orpa o bweleya ga vathu vaye ni ga vanungungulu vaye. Bweleya naye.’ Ganiolu, Rute a di hlamula khuye: ‘Kha nyi na nga gu diga. Vathu vago va na khala vathu vangu neni, ni Nungungulu wago a na khala Nungungulu wangu neni.’ Dzi pwide kharini Nowemi tepo a nga embedwa malito yoyo khu Rute?

Rute ni Nowemi va vbohide Israyeli gupheyani nya nango nya gu havedwe nya sevhadha. Litshigu limwedo, Rute a di hongola thembweni ga mwama moyo nyo pwani khu Bhowazi, a nga ba ari gyanana gya Rahabhi. A di ya roledzeya esi si nga ba si tshiyedzedwa tepo va nga ba va haveya sevhadha. Bhowazi a dipwa gu pwani Rute Mumowabhi a nga ba a yeyedzide  gutumbega ga Nowemi. A di embeya sithumi saye gu khuye si tshiyedzeya dzimbewunyana thembweni gasi Rute a roledzeya.

Ni siyambo sakona, Nowemi a di wudzisa Rute khuye: ‘U di gu thuma thembweni ga mani muhuno?’ Rute a di hlamula khuye: ‘Thembweni ga Bhowazi.’ Nowemi a di mu embeya khuye: ‘Bhowazi nongo wa mwama wangu. Simama gu thuma thembweni gwaye ni esi simbe sagadzyana. U na sayisega.’

Rute a di simama gu thuma thembweni ga Bhowazi kala va vbedza gu haveya dzimbewu. Bhowazi a di wona gu khuye Rute a di gu thuma khu sighingi nigu a diri nyamayi nya wadi ngudzu. Dziteponi dzodzo, mwama a gufa na sa velega gyanana, mwangadzi waye a di gu tshala a dzegwa khu nongo waye. Khu kharato, Bhowazi a di dzegana ni Rute, va velega gyanana nya gikhwatana va gi riya lina nyo pwani khu Obhedhi, oyu a nga khala vhovho wa Dhavhidhe. Dzipari dza Nowemi dzi di tsaka ngudzu, khidzo: ‘Nyo pheye, Jehovha a gu ningide Rute, oyu a gu sayisago gwadi. Olu a gu ningide tugulu. A na dhumiswe Jehovha.’