Ga tepo yeyi gambe, Vaisrayeli va di pheledzide gu khozeya vanungungulu nya malipha. Khu kharato, Jehovha a di diga Vafiilistiya va fumeya litigo lawe. Ganiolu, gu diri ni Vaisrayeli nyo khaguri va nga ba va mu haladza Jehovha. Moyo wakona, gu diri Manowa. Uye ni mwangadzi waye va diri mwalo gyanana. Ga litshigu nyo khaguri, Jehovha a di rumeya ngilozi ga mwangadzi waye, yi ya mu embeya khiyo: ‘U na velega gyanana nya gikhwathana. Gyanana gyogyo gi na tshudzisa Vaisrayeli ga Vafiilistiya. Gi na ba giri Munaziri.’ U ngu dziti gu khuwe Vanaziri va diri vathu nyo khale kharini? Va diri sithumi nyo hathege sa Jehovha. Vanaziri kha va nga ba va dzumeledwa gu piya ndzudzu.

Khu gu gimbiya nya tepo, gyanana gya Manowa gi di velegwa, khavbovbo a gi riya lina nyo pwani khu Samisoni. Tepo Samisoni a nga dandra, Jehovha a di mu ninga tshivba. A di gu si kodza gu songa nghala khu mandza basi. Litshigu limwedo, Samisoni a di songa 30 Vafilistiya enga. Vafilistiya va di mu nyenya, khavbovbo va pheya gu vbwetedzeya dzindziya nya gu mu songe. Ga wutshigu nyo khaguri, na lade eyi Gaza, Vafilistiya va di hongola vbamwanya nya lidhoropa va vireya gasi va mu songa ni dzimindru dzakona. Ganiolu, ni vbakari nya wutshigu, Samisoni a di wuga a hongola vbamwanya nya lidhoropa, a ya dusa lidimba lakona nya likhongolo avba nya paredhi. A di pinga lidimba lolo a hongola nalo kala vbatshani nya gigomo gi nga ba giri vbafuvbi ni Hebroni!

Khu hwane nya tepo, Vafilistiya va di hongola ga Dhalila namoradha ya Samisoni, va ya khavo: ‘Wo hi embeya gu khuwe khu ginani Samisoni a gu na ni tshivba yile nya yikhongolo ngudzu, hi na gu ninga dzitsapawu nya dzingi ngudzu. Ho vbweta gu mu mola hi ya mu khoteya pasoni.’ Dhalila a di dzumeya, kholu a di gu dzi vbweta dzitsapawu dzodzo. Gupheyani, Samisoni a di bomba gu mu embeya gu khuye khu ginani a gu na ni tshivba yatshavbo yile nya yikhongolo ngudzu. Ganiolu, Dhalila a di mu gurumedza kala a dzumeya gu mu embeya egi gi nga ba gi mu gira a manega ni tshivba nya yikhongolo. A di embeya Dhalila khuye: ‘Eni gima nyi si piyi ndzudzu kholu nyi Munaziri. Wo tshuka wu pidwa ndzudzu wangu, nyi na vbeya tshivba.’ Samisoni giride gihoso nya gikhongolo ngudzu khu gu mu embeya isoso, khandridzo?

 Dhalila a di dzegeya gu ya embeya Vafilistiya khuye: ‘Eni nyi ngu giti egi gi girago Samisoni a manega ni tshivba nya yikhongolo!’ Dhalila a di ladzisa Samisoni avba nya dzikhingimidzi dzaye, khavbovbo a ranisa muthu a ta mu piya ndzudzu. Dhalila a di khusedza lito khuye: ‘Samisoni, ava avba Vafilistiya! Samisoni a di wuga. Khu tepo yoyo, a diri mwalo gambe tshivba. Vafilistiya va di mu mola, va mu pola maho va ya mu khoteya pasoni.

Litshigu limwedo, Vafilistiya nya vangi ngudzu va di tshangana omu nya tempele ya nungungulu wawe Dhagoni, khavbovbo va ganeya esi khu lito nyo khugege: ‘Hi ningidwe Samisoni khu nungungulu wathu! Mu duseni vbavbandze hi ta hagana naye.’ Va di mu emisa vbakari nya dzipilari dzimbili nya tempele va pheya gu mu poyileya ni gu mu hega. Samisoni a di rana Jehovha khu lito nyo khugege khuye: ‘O Jehovha, nyo lomba gu kheni u nyi ninga tshivba gumogo basi.’ Khu tepo yoyo, ndzudzu wa Samisoni wu di dandride wu lapha gambe. A di txhovha dzipilari nya tempele khu tshivba yaye yatshavbo. Tempele yatshavbo yi di khungumuga yi thega, yi songa vathu vatshavbo va nga ba vari umo nya tempele, gupata ni Samisoni.